ફિયાન્સ સાથે ધોધ પર સેલ્ફી લેવાના ચક્કરમાં પગ લપસતાં આશાસ્પદ યુવતીનું મોત

આંધ્ર પ્રદેશની એક યુવતીનું અમેરિકામાં ડૂબી જવાથી મોત થયું છે. તે આકસ્મિક રીતે લપસીને ધોધમાં પડી ગઈ હતી. યુવતીના પરિવારના જણાવ્યા અનુસાર, તે પોતાના ફિયાન્સે સાથે સેલ્ફી લેવા ગઈ તે દરમિયાન તેની સાથે આ દુર્ઘટના બની હતી. એટલાન્ટામાં પોતાના સંબંધીઓને મળીને ઘરે પાછા આવતી વખતે પોલવરપુ કમલા અને તેનો ફિયાન્સે ટેનેસી નજીક બાલ્ડ રિવર ફૉલ્સ પાસે રોકાયા હતા. અહેવાલ પ્રમાણે આ કપલ સેલ્ફી લેતું હતું અને અચાનક તે બંને ત્યાંથી લપસ્યા હતા અને ધોધમાં પડ્યા હતા.

સાઈટ પર હાજર અન્ય લોકો દ્વારા યુવકને બચાવી લેવાયો હતો પરંતુ તે સમયે કમલા ત્યાંથી ગુમ હતી. બાદમાં તે કિનારા પડેલા એક લાકડા પર બેભાન અવસ્થામાં મળી આવી હોવાનું જાણવા મળ્યું. બચાવનારા લોકો દ્વારા લાંબા સમય સુધી CPRથી તેને બચાવવાના પ્રયત્નો કરવામાં આવ્યા પરંતુ તેમાં સફળતા મળી નહીં.

કમલા આંધ્ર પ્રદેશના ક્રિષ્ના જિલ્લાના ગુડલાવલેરુંની હતી અને તે પોતાનું ગ્રેજ્યુએશન પૂરું કર્યા બાદ અમેરિકા ગઈ હતી. તે ઓહાયોની એક સૉફ્ટવેર કંપનીમાં કામ કરતી હતી.

મૃતક યુવતીની માતા દ્વારા કહેવામાં આવ્યું કે, 'તે એન્જિનિયરિંગમાં ગ્રેજ્યુએશન કર્યા બાદ પોતાના આગળના ભણતર માટે અમેરિકા ગઈ હતી. ત્યાં તેણે એક જૉબ પણ શોધી લીધી હતી.' યુવાન દીકરીના આવા આકસ્મિક મૃત્યુથી તેના પરિવારજનો ખૂબ દુ:ખમાં છે. કમલાના પરિવારમાં તેના માતા-પિતા ઉપરાંત નાની એક બહેન પણ છે જેના લગ્ન થઈ ચૂક્યા છે અને તે ચેન્નઈમાં રહે છે.

હવે મૃતક યુવતીની ડેડબૉડીને ભારત પરત લાવવા પ્રયત્નો કરવામાં આવી રહ્યા છે. કમલાના પિતા દ્વારા કહેવામાં આવ્યું કે, 'ધ તેલુગુ એસોસિએશન દ્વારા કહેવામાં આવ્યું છે તેઓ તેના મૃતદેહને ઘરે લાવવામાં અમારી મદદ કરશે.'

ઉલ્લેખનીય છે કે, છેલ્લા કેટલાક વર્ષોમાં સેલ્ફી લેવાના ચક્કરમાં ઘણા બધા લોકો પોતાનો જીવ ગુમાવી ચૂક્યા છે અને ઘણી મોટી દુર્ઘટનાઓ ઘટી છે. કેટલાક દેશોની સરકાર દ્વારા જે-તે સ્થળો પર સેલ્ફી લેવા પર પ્રતિબંધ મૂકવામાં આવ્યા છે. ટૂરિસ્ટ પ્લેસ, ઊંચા વિસ્તારવાળી જગ્યાઓ, નદી, તળાવ, ધોધ, દરિયા જેવી વધુ રિસ્કવાળી જગ્યાઓ પર સેલ્ફીને લઈને હજુ સખત કાયદા બનવા જોઈએ તેવી ડિમાન્ડ વારંવાર કરવામાં આવતી રહી છે.