અમેરિકાઃ ક્લિનિકલ ટ્રાયલના ત્રીજા તબક્કામાં પહોંચી એસ્ટ્રાજેનેકાની કોરોના રસી

વિશ્વના મોટાભાગના દેશોને જીવલેણ કોરોના વાયરસે ભરડામાં લઈ લીધા છે. વધી રહેલા મહામારીના કહેર વચ્ચે દરેક દેશ તેની રસી શોધવામાં લાગ્યો છે. આ દરમિયાન જગત જમાદાર અમેરિકાના રાષ્ટ્રપ્રમુખ ડોનાલ્ડ ટ્રમ્પનું કહેવું છે કે, અમેરિકી કંપની એસ્ટ્રાજેનેકા દ્વારા તૈયાર કરવામાં આવી રહેલી કોવિડ 19ની રસીનું ક્લિનિકલ ટ્રાયલ ત્રીજા તબક્કામાં પહોંચી ગયું છે.

ડોનાલ્ડ ટ્રમ્પે તેમ પણ કહ્યું કે, કોરોનાની આ દવાને ટૂંક સમયમાં મંજૂરી પણ મળી શકે છે. ટ્રમ્પે કહ્યું, 'મને જણાવતાં ખુશી થઈ રહી છે કે, કોરોનાની રસી વિકસિત કરી રહેલી એસ્ટ્રાજેનેકાની રસી પોતાના ટેસ્ટ માટે ત્રીજા તબક્કામાં પહોંચી ચૂકી છે. આ તેવી રસીની યાદીમાં સામેલ થઈ ચૂકી છે જે બનવાની ઘણી નજીક છે. લોકોને લાગી રહ્યું હતું કે, આ અશક્ય છે પરંતુ અમે અમેરિકામાં આ કરી બતાવ્યું'.



અમેરિકાના રાષ્ટ્રપ્રમુખે કહ્યું કે, કોવિડ-19ની રસી બનાવવામાં ઘણો સમય લાગી શકતો હતો, પરંતુ તેમના તંત્રએ આ કામ થોડા મહિનામાં જ કરી બતાવ્યું. તેમણે કહ્યું કે, દેશના 30 હજાર વોલેન્ટિયર્સ પર કોરોનાની રસીનું ટ્રાયલ કરવામાં આવશે. ડોનાલ્ડ ટ્રમ્પનું વહીવટી તંત્ર અમેરિકામાં હાલ ઓપરેશન વાર્પ સ્પીડ ચલાવી રહ્યું છે. જે અંતર્ગત કોરોના સામે લડવા માટેની તૈયારીઓ પૂરજોશમાં ચાલી રહી છે.

અમેરિકામાં એસ્ટ્રાજેનેકાની રસીનું ત્રીજા તબક્કાના ટ્રાયલમાં પહોંચવું તે પણ વાર્પ સ્પીડનો જ એક ભાગ છે. આ ઓપરેશનનો ઉદ્દેશ વર્ષ 2021 સુધીમાં કોરોનાની સુરક્ષિત અને 30 કરોડ સપ્લિમેન્ટ તૈયાર કરવાનો છે.

એસ્ટ્રાજેનેકા સિવાય મોડર્ના પણ કોરોનાની રસી બનાવવાની નજીક પહોંચી રહી છે. ટૂંક સમયમાં આ રસીને પણ મંજૂરી મળી શકે છે. ફૂડ એન્ડ ડ્રગ્સ વિભાગના હેડ સ્ટીફન હાનના જણાવ્યા પ્રમાણે, જો ત્રીજા તબક્કાનું ક્લિનિકલ ટ્રાયલ સફળ રહ્યુ તો જલ્દીથી તેનું રજિસ્ટ્રેશન કરવામાં આવશે.