દીકરીના બોયફ્રેન્ડને ઓબામાએ રાખ્યો હતો ઘરમાં, કહ્યું- 'ખૂબ ખાતો હતો, ખર્ચ વધી ગયો'

અમેરિકાના પૂર્વ રાષ્ટ્રપ્રુમખ બરાક ઓબામાએ હાલમાં જ ખુલાસો કર્યો છે કે, કોરોના મહામારીમાં ક્વોરન્ટીન સમય દરમિયાન દીકરીનો બોયફ્રેન્ડ તેમના ઘરે રહેતો હતો. ઓબામાએ જણાવ્યું કે, એક યુવાન વ્યક્તિના વધુ ખોરાકને કારણે તેમનું કરિયાણાનું બિલ 30 ટકા વધી ગયું હતું.

એક પોડકાસ્ટ શોમાં ઓબામાએ જણાવ્યું કે, મહામારીના પ્રારંભિક દિવસોમાં તેમની દીકરી મલિયા (Malia)નો બોયફ્રેન્ડ તેમના ઘરે જ ક્વોરન્ટીન થયો હતો. ઉલ્લેખનીય છે કે, મલિયા ઓબામાની મોટી દીકરી છે અને તેની ઉંમર 22 વર્ષ છે. મલિયાના બોયફ્રેન્ડનું નામ રોરી ફર્કુહર્સન (Rory Farquharson) અને તે બ્રિટિશ છે.

ઓબામાએ જણાવ્યું કે, વિઝાની સમસ્યાને લીધે રોરી તેમની સાથે રહતો હતો. ઓબામાએ કહ્યું, "વિઝાને લઈને ઘણી બાબતો હતી. તેની નોકરી હતી. એટલા માટે અમે તેને અમારી સાથે રહેવા દીધો. હું તેને પસંદ નહોતો કરવા માગતો પરંતુ તે સારો છોકરો છે." ઓબામાએ એમ પણ કહ્યું કે, લોક઼ડાઉન દરમિયાન તેમણે બંને દીકરીઓ મલિયા અને સાશા તેમજ રોરી સાથે કેટલીક યાદગાર ક્ષણો વિતાવી છે. ઓબામાએ આ ત્રણેયને પત્તા રમતાં પણ શીખવ્યા હતા.

ઓબામાએ આગળ જણાવ્યું કે, રોરીનું ડાયટ તેમની દીકરીઓ કરતાં અલગ હતું. તેને જમતો જોઈને તેમને અજુગતું લાગતું હતું. આ કારણે તેમનું ગ્રોસરીનું બિલ 30 ટકા વધી ગયું હતું. જો કે, વધુ બિલની વાત ઓબામાએ હળવી શૈલીમાં કરી હતી. મીડિયા રિપોર્ટ પ્રમાણે, ઓબામાની દીકરી મલિયા અને રોરીની મુલાકાત 2017માં હાવર્ડમાં અભ્યાસ કરતી વખતે થઈ હતી.