3 ડોલરની કિંમતે મળશે વેક્સીન
શુક્રવારે બિલ ગેટ્સે આ જાહેરાત કરી હતી કે તેઓ દુનિયાની સૌથી મોટી વેક્સીન ઉત્પાદક સીરમ ઈન્સ્ટીટ્યુટ ઈન્ડિયાને કોવિડ-19ની વેક્સીન 3 ડોલર પ્રતિ ડોઝની (અંદાજે 225 રૂપિયા) કિંમતે 100 મિલિયન વેક્સીન ડોઝ બનાવવા માટે આ રકમ આપશે. આ ડોનેશનથી દુનિયાના ગરીબ તથા વિકાસશીલ દેશોને વેક્સીન મેળવીને લોકોનું જીવન બચાવવામાં મદદ મળશે.
વિકસિત દેશોમાં સ્થિતિ ખરાબ
બિલ ગેટ્સ કોરોના વાયરસની ગરીબ તથા ઓછી માથાદીઠ આવક ધરાવતા દેશના લોકોના જીવન પર પડેલી અસરો પર ખાસ ભાર મૂકતા આવ્યા છે. તેમણે ચિંતા વ્યક્ત કરી હતી કે વિકસિત દેશો તો મહામારીમાંથી બહાર આવી જશે, પરંતુ ગરીબ દેશોના લોકોને સૌથી વધુ મુશ્કેલીઓનો સામનો કરવો પડશે.
સસ્તી કિંમતે અપાવશે વેક્સીન
હાલમાં જ બ્લૂમબર્ગને આપેલા ઈન્ટરવ્યૂમાં બિગ ગેટ્સે જણાવ્યું કે, તેઓ અસ્ત્રાજેનેકા અને નોવાવેક્સ દ્વારા ડેવલપ કરાતી વેક્સીનને વિકાસશીલ અને ગરીબ દેશોમાં પોષાય તેવી નજીવી કિંમતે ઉપલબ્ધ કરાવવા પર કામ કરી રહ્યા છે. તેમના શબ્દોમાં આ લોકોને દવાની કિંમતની સૌથી વધુ અસર થશે.
સીરમ ઈન્ટીટ્યૂટ ઓફ ઈન્ડિયાને આપશે 150 મિલિયન
વેક્સીનની કિંમત સૌથી ઓછી રાખવા માટે 150 મિલિયન ડોલર ખૂબ જરૂરી છે. આ પહેલા સીરમ ઈન્સ્ટીટ્યૂટ ઈન્ડિયાએ પણ જાહેરાત કરી હતી કે તે કોરોના વેક્સીન માત્ર ભારત જ નહીં અન્ય વિકાસશીલ અને ગરીબ દેશોને પણ 3 ડોલર જેટલી નજીવી કિંમતે આપશે. ઓક્સફર્ડની કોરોના વેક્સીન ભારતમાં Covishield નામથી વેચાશે અને ભારતમાં તેનું ટ્રાયલ પણ શરૂ થઈ ગયું છે.
વેક્સીનના ડિસ્ટ્રીબ્યૂશનમાં પણ કરશે મદદ
શુક્રવારે 150 મિલિયન ડોલરની મદદ પહેલા બિલ ગેટ્સ કોવિડ-19 વેક્સીનને ખરીદવા અને ડિસ્ટ્રીબ્યૂટ કરવા Gaviને 100 મિલિયન ડોલર આપવાનું પણ વચન આપ્યું હતું. ઉપરાંત તેમણે જૂનમાં આગામી 5 વર્ષોમાં 1.6 બિલિયન ડોલર વેક્સીનના ડ્રિસ્ટ્રીબ્યૂશન માટે આપવાની વાત કરી હતી. રિપોર્ટ મુજબ, બિલ ગેટ્સ કોરોનાની મહામારીમાં 500 મિલિયન ડોલર ખર્ચ કરવાનું વચન આપી ચૂક્યા છે.