કોરોનાની રસી આવે તે પહેલા ચીનમાં તેના કાળાબજાર શરુ, ડોઝની કિંમત હજારો રુપિયા

બેજિંગ: કોરોનાની હજુ સુધી સરકારી માન્યતા પ્રાપ્ત રસી બજારમાં આવી નથી તે પહેલા જ ચીનમાં તેના કાળાબજાર શરુ થઈ ગયા છે. મળતી માહિતી અનુસાર, લોકો સિનોફાર્મ નામની કંપની દ્વારા બનાવાઈ રહેલી રસીના શોટ્સ માટે છ હજાર રુપિયા સુધી ચૂકવી રહ્યા છે.

ચેંગ નામના બેજિંગમાં બિઝનેસ ધરાવતા એક વ્યક્તિને અમેરિકા જવાનું હતું. તેના પહેલા તે કોરોનાની રસી લેવા ઈચ્છતો હતો. તેણે કોલ્ડ-ચેઈન લોજિસ્ટિક કંપનીમાં કામ કરતા પોતાના એક દોસ્તને તેના વિશે વાત કરી, અને આખરે 91 ડોલરમાં ગુઆંગડોંગ જઈ રસી લેવાનું નક્કી કરાયું. વેક્સિન લેવા માટે ડોઝના પૈસા આપવા ઉપરાંત બેજિંગથી ગુઆંગડોંગ વચ્ચે લાંબો પ્રવાસ પણ તેણે કરવો પડ્યો.

એસ્ટ્રાઝેનેકાથી લઈને ફિઝર જેવી કંપનીઓ રસી બનાવવાની પૂર્ણતાને આરે છે, ત્યારે દુનિયાના વિવિધ દેશો માટે સૌથી મોટી ચેલેન્જ આ રસીના ડોઝ દરેક નાગરિકને આપવાની છે. રસીના સ્ટોરેજ, ટ્રાન્સપોર્ટેશન સહિતના પ્રશ્નો હજુ ઉભા જ છે, તેવામાં તેનો સપ્લાય ખૂટી પડશે તેવા ડરે તેના બ્લેકમાર્કેટ પણ શરુ થઈ ચૂક્યા છે.

ચીનમાં લોકલ ડેવલપર્સને આ વર્ષના મધ્યભાગથી જ ઈમરજન્સી યુઝમાં રસીનો ઉપયોગ કરવાની મંજૂરી આપી દીધી છે. હાલ ચીનમાં માત્ર ફ્રંટ-લાઈન વર્કર્સ જેવા કે મેડિકલ સ્ટાફ તેમજ પોર્ટ પર કામ કરતા લોકોને જ રસી આપવાની પરમિશન છે. જોકે, બ્લૂમબર્ગના રિપોર્ટ અનુસાર, ગેરકાયદે રીતે અનેક લોકો હજુ સુધી બજારમાં ના આવેલી રસીના ડોઝ લઈ રહ્યા છે.

પશ્ચિમના દેશોની ફાર્મા કંપનીઓની માફક ચીનમાં રસી બનાવનારી કંપનીઓએ હજુ સુધી તેની ત્રીજા તબક્કાની ટ્રાયલનો ડેટા રજૂ નથી કર્યો. જેથી આ રસી ખરેખર કેટલી અસરકારક છે તેના પર સવાલો ઉભા થવા સ્વાભાવિક છે. જોકે, આ બધાની પરવાહ કર્યા વિના જે લોકોને ચીનની બહાર જવાનું છે તે લોકો ગમે તેમ કરીને રસી લેવાની ગોઠવણ કરી રહ્યા છે.

ચાઈન નેશનલ બાયોટેક ગ્રુપ કંપનીના જણાવ્યા અનુસાર, તેની રસીની ફાઈનલ હ્યુમન ટ્રાયલ આર્જેન્ટિનાથી લઈને ઈજિપ્ત સુધીના દેશોમાં 50,000 લોકો પર ચાલી રહી છે, અને તેમાં હજુ સુધી કોઈ ગંભીર કહી શકાય તેવી આડઅસર જોવા મળી નથી.