બોર્ડર પાર કરતા ગુજરાતી પરિવારનું ઠંડીથી મોત, કેનેડાના PMએ વ્યક્ત કર્યું દુ:ખ

ટોરેન્ટો, કેનેડા: કેનેડાના વડાપ્રધાન જસ્ટિન ટ્રુડોએ કહ્યું કે અમારી સરકાર અમેરિકાની સરહદ પર થતી ઘૂસણખોરી રોકવા માટે શક્ય તમામ પ્રયાસ કરી રહી છે. એક દિવસ પહેલાની ઘટનામાં એક બાળક સહિત ચાર ભારતીયોના અમેરિકા સાથે જોડતી કેનેડાની સરહદ પર ભારે ઠંડીના કારણે મોત થયા બાદ કેનેડાના વડાપ્રધાનનું આ નિવેદન સામે આવ્યું છે. મૃતક તમામ લોકો એક જ પરિવારના હોવાનું જાણવા મળ્યું છે.કેનેડાના વડાપ્રધાન જસ્ટિન ટ્રુડોએ પ્રેસ કોન્ફરન્સમાં કહ્યું કે આ ઘટના સંપૂર્ણરીતે હચમચાવનારી છે. કોઈ પરિવારનું આ રીતે મૃત્યુ થાય તે ખૂબ જ દુ:ખદ છે. આ કારણે જ અમે લોકોને અનિયમિત અને ગેરકાયદેરીતે સરહદ પાર કરતા રોકવા માટે સંભવ તમામ પ્રયાસ કરી રહ્યા છે. અમે જાણીએ છીએ કે આવું કરવામાં મોટું જોખમ રહેલું છે. કેનેડાના પીએમએ વધુમાં જણાવ્યું કે કેનેડા ઘૂસણખોરી રોકવા અને લોકોને 'અસ્વીકાર્ય જોખમ લેતા' રોકવામાં મદદ કરવા માટે અમેરિકા સાથે મળીને કામ કરી રહ્યું છે. કેનેડાના અધિકારીઓના જણાવ્યા અનુસાર, આ ઘટના અસામાન્ય હતી કારણકે ગેરકાયદે પ્રવાસીઓ સામાન્યરીતે અમેરિકાથી કેનેડામાં પ્રવેશવાના પ્રયાસ કરે છે, કેનેડાથી અમેરિકા જવા માટેના નહીં.
US-કેનેડા બોર્ડર પર નવજાત સહિત 4 ગુજરાતીઓના -35 ડિગ્રી ઠંડીમાં થીજીને મોત
ગુરુવારે મેનિટોબા રોયલ કેનેડિયન માઉન્ટેડ પોલીસે કહ્યું કે બુધવારે ચાર લોકોના મૃતદેહ મળી આવ્યા છે જેમાં 2 લોકો મોટી ઉંમરના, એક કિશોર અને એક બાળક છે. દક્ષિણ મધ્ય મેનિટોબામાં એમર્સન વિસ્તાર પાસે અમેરિકા/કેનેડા સીમાના કેનેડા તરફ આ મૃતદેહો મળી આવ્યા. એવું માનવામાં આવી રહ્યું છે કે પરિવાર ગુજરાતી હતો અને વધારે ઠંડીના કારણે તેઓનું મોત નીપજ્યું. આ જૂથે માઈનસ 35 ડિગ્રી સેલ્સિયસ તાપમાનમાં અમેરિકા-કેનેડાની સરહદ પાર કરી હતી. તેમના મૃતદેહો કેનેડાની બાજુએ યુએસ સરહદની એક મીટરની અંદર મળી આવ્યા હતા. હચમચાવનારી આ ઘટનામાં સાત અન્ય ભારતીયોની ધરપકડ કરવામાં આવી છે. એવું માનવામાં આવી રહ્યું છે કે ધરપકડ કરાયેલા લોકો ગુજરાતના છે અને તેઓ તમામ અમેરિકામાં ગેરકાયદેરીતે રહે છે.

મેનિટોબામાં એક કેનેડિયન અધિકારીએ પત્રકારોને જણાવ્યું હતું કે “અમે ખૂબ જ ચિંતિત છીએ કે આ બોર્ડર ક્રોસિંગનો પ્રયાસ કેટલો દુઃખદ રહ્યો હશે અને આ વ્યક્તિઓ, જેમાં એક નવજાત પણ છે તેમને ભારે હિમવર્ષા વચ્ચે પોતાની સ્થિતિ પર છોડી દેવામાં આવ્યા હતા, જ્યારે બહાર માઈનસ 35 ડિગ્રી સેલ્સિયસ જેટલી આકરી ઠંડી હતી. આ ભોગ બનનારાએ માત્ર ઠંડા હવામાનનો જ નહીં પણ કાતિલ પવનો વચ્ચે કેટલાય કિમીના લાંબા વિસ્તાર, મોટા બરફના પ્રવાહો અને સંપૂર્ણ અંધકારનો પણ સામનો કર્યો હતો. વધુ મળતી માહિતી મુજબ, લગભગ 11 કલાકથી ભારે ઠંડીની સ્થિતિમાં તેઓ ચાલતા હતા. જૂથના સભ્યોમાંના એક પાસે એક બેકપેક હતું જેમાં નવજાતનો સામાન હતો - કપડાં, એક ડાયપર, રમકડાં. તપાસ કરતા બહાર આવ્યું કે તે ચાર વ્યક્તિના પરિવાર માટે આ સામાન પોતાની સાથે લઈને ચાલી રહ્યો હતો. જેઓ રાત્રે ભારે હિમવર્ષા દરમિયાન અલગ થઈ ગયા હતા. બાદમાં આ પરિવાર યુએસ બોર્ડરથી 30 ફૂટ દૂર થીજી ગયેલો જોવા મળ્યો હતો.