ગંભીર આડઅસરના કારણે અટકાવી દેવામાં આવી છે ટ્રાયલ
કંપનીએ મંગળવારે જણાવ્યું હતું કે, અમને વિશ્વાસ છે કે વેક્સીન સુરક્ષિત છે. બ્રાઝિલના સ્વાસ્થ્ય વિભાગે જણાવ્યું છે કે 29 ઓક્ટોબરે વેક્સીન મેળવનારા વોલેન્ટિયર પર ગંભીર આડઅસર થઈ હતી અને ત્યારબાદ કોરોનાવેક વેક્સીનની ટ્રાયલને રોકી દેવાામાં આવી છે. જોકે, ગુપ્તતાના નિયમોના કારણે તેઓ તેની વિગતો જાહેર કરી શકે તેમ નથી. તેથી વોલેન્ટિયર પર કઈ ગંભીર આડઅસર થઈ છે તે વિગતો જાણવા મળી નથી.
આડઅસર વેક્સીનના કારણે નથીઃ કંપની
વેક્સીન તૈયાર કરનારી કંપની સિનોવેક બાયોટેકે જણાવ્યું છે કે અમને વિશ્વાસ છે કે અમારી વેક્સીન સુરક્ષિત છે. આ ઉપરાંત કંપનીએ કહ્યું છે કે આ ઘટનાને વેક્સીન સાથે કોઈ લેવા દેવા નથી અને આ અંગે બ્રાઝિલ સરકાર સાથે સતત વાતચીત કરતા રહીશું. ચીન હાલમાં ચાર વેક્સીન પર કામ કરી રહ્યું છે જે ત્રીજા સ્ટેજના ક્લિનિકલ ટ્રાયલમાં પહોંચી ગઈ છે. નોંધનીય છે કે હાલમાં બ્રાઝિલમાં 10,000થી વધુ લોકો પર આ વેક્સીનની ટ્રાયલ ચાલી રહી છે.
બ્રાઝિલના રાષ્ટ્ર પ્રમુખ ચીની વેક્સીનની વિરુદ્ધ છે
બ્રાઝિલના રાષ્ટ્ર પ્રમુખ જેયર બોલસોનારોએ ચીનની કોવિડ-19 વેક્સીનનો વિરોધ કર્યો હતો. તેમણે કહ્યું હતું કે બ્રાઝિલના લોકો કોઈના માટે ગિની પિગ બની શકે નહીં. તેમણે થોડા દિવસ પહેલા જાહેરાત કરી હતી કે તેમનો દેશ ચીનના કોરોના વાયરસની વેક્સીન ખરીદશે નહીં. રાષ્ટ્ર પ્રમુખ બોલસોનારોએ સોશિયલ મીડિયા પર પોતાના એક સમર્થકનો જવાબ આપતા લખ્યું હતું કે ચોક્કસથી અમે ચીનની વેક્સીન ખરીદીશું નહીં. નોંધનીય છે કે ચીનની વેક્સીનને લઈને બ્રાઝિલના રાજકારણમાં પણ તકરાર જોવા મળી રહી છે.
એસ્ટ્રેજેનેકાની વેક્સીન તૈયાર કરશે બ્રાઝિલ
બ્રાઝિલની સરકારે પહેલાથી જ એસ્ટ્રેજેનેકા અને ઓક્સફોર્ડ યુનિવર્સિટીની કોરોના વાયરસ વેક્સીન ખરીદવાની તૈયારી કરી લીધી છે. એટલું જ નહીં તે વેક્સીનને પોતાના બાયોમેડિકલ રિસર્ચ સેન્ટરમાં પણ તૈયાર કરી રહી છે. ચીનની વેક્સીનના ટ્રાયલને લઈને સોમવારે પ્રથમ રિપોર્ટ જારી કરવામાં આવ્યો હતો. જેમાં કહેવામાં આવ્યું હતું કે બ્રાઝિલના 9000 લોકો ઉપર વેક્સીનની સારી અસર જોવા મળી છે.
કોરોનાથી સૌથી ખરાબ રીતે અસરગ્રસ્ત દેશોમાં બ્રાઝિલ ત્રીજા ક્રમે
કોરોના વાયરસથી સૌથી ખરાબ રીતે અસરગ્રસ્ત દેશોમાં બ્રાઝિલ ત્રીજા ક્રમે છે. બ્રાઝિલમાં અત્યાર સુધી 56,75,766 કોરોનાના કેસ નોંધાયા છે. કોરોનાના સૌથી વધુ કેસોની યાદીમાં બ્રાઝિલ વિશ્વમાં અમેરિકા અને ભારત બાદ ત્રીજા ક્રમે છે. જ્યારે કોવિડ-19થી થયેલા મૃત્યુમાં તે અમેરિકા બાદ બીજા સ્થાને છે. બ્રાઝિલમાં અત્યાર સુધી કોરોનાથી 1,62,638 લોકોના મોત થયા છે.