હવે ચિકનમાં કોરોનાઃ ચીને દાવો કર્યો છે કે બ્રાઝિલથી આવેલા ચિકનમાં મળ્યો વાયરસ

વહિવટી તંત્રએ ગુરૂવારે જણાવ્યું હતું કે શેન્ઝેનના લોન્ગન્ગ જિલ્લામાં આયાત કરવામાં આવેલા ફ્રોઝન ફૂડની તપાસ દરમિયાન ચિકન વિંગ્સમાંથી લેવામાં આવેલા સેમ્પલમાં કોરોના વાયરસ ડિટેક્ટ થયો છે. જોકે, ત્યારબાદ તંત્ર હરકતમાં આવી ગયું હતું અને આ વાયરસ વધારે ન ફેલાય તે માટે કામગીરી શરૂ કરી દેવામાં આવી હતી.

મીડિયા અહેવાલ પ્રમાણે શેન્ઝેનના સ્વાસ્થ્ય અધિકારીઓએ તાત્કાલિક તે લોકોને ટ્રેસ કરવાનું શરૂ કર્યું હતું જે આ પ્રોડક્ટના સંપર્કમાં આવ્યા હતા. આ ઉપરાંત તેમનો ટેસ્ટ પણ કરવામાં આવ્યો હતો. જોકે, તમામ લોકોના રિપોર્ટ નેગેટિવ આવ્યા હતા. જાહેર કરવામાં આવેલા નિવેદન પ્રમાણે સ્ટોકમાં હાજર તમામ સંબંધિત ઉત્પાદનોને સીલ કરી દેવામાં આવ્યા છે અને તમામનો રિપોર્ટ નેગેટિવ આવ્યો છે.

કઈ કંપનીની બ્રાન્ડમાં આ કોરોના વાયરસ મળ્યો છે તે અધિકારીઓએ જાહેર કર્યું નથી. અધિકારીઓએ તે બ્રાન્ડના નામની જાહેરાત કરી નથી પરંતુ તેના તમામ ઉત્પાદનોને ટ્રેસ કરવાનું શરૂ કરી દીધું છે જેનું પહેલા વેચાણ થયું છે. આ ઉપરાંત તે વિસ્તારને પણ ડિસઈન્ફેક્ટ કરવામાં આવી રહ્યા છે જ્યાં આ ચિકન વિંગ્સને સ્ટોર કરવામાં આવ્યા હતા.

મીડિયા અહેવાલ પ્રમાણે વર્લ્ડ હેલ્થ ઓર્ગેનાઈઝેશન તથા યુએસ સેન્ટર્સ ફોર ડિસિઝ કંટ્રોલ એન્ડ પ્રિવેન્શન સહિત અનેક સ્વાસ્થ્ય અધિકારીઓનું કહેવું છે કે કોઈ પણ ખાદ્યપદાર્થથી વાયરસ મળે તેની શક્યતા ઓછી છે. ડબલ્યુએચઓ એ કહ્યું છે કે કોઈ ખાદ્યપદાર્થ કે તેના પેકિંગના કારણે કોરોના વાયરસનો ચેપ લાગે તેવી શક્યતા ઘણી ઓછી છે. જ્યારે સીડીસી એ કહ્યું છે કે ખાદ્ય પદાર્થો, તેના પેકિંગ કે થેલીના કારણે વાયરસના ચેપની શક્યતા ઘણી ઓછી માનવામાં આવે છે.

જૂનમાં જ્યારે બેઈજિંગમાં શહેરના સૌથી મોટા હોલસેલ ફૂડ માર્કેટમાં કોરોના વાયરસ ફેલાયો ત્યારથી ચાઈનિઝ સત્તાવાળાઓએ આયાત કરવામાં આવેલા મીટ તથા સીફૂડ પ્રોડક્ટનું સ્ક્રીનિંગ વધારી દીધું છે. સ્ટેટ મીડિયાએ જણાવ્યું હતું કે માર્કેટમાં આયાત કરવામાં આવેલી સાલમન માછલીને કાપવા માટે ઉપયોગમાં લેવામાં આવતા બોર્ડ પર કોરોના વાયરસ મળ્યા બાદ માર્કેટમાંથી સાલમનને હટાવી લેવામાં આવી હતી.