મંગળ ગ્રહ પર લેન્ડ થયું યાન
ચીનની નેશનલ સ્પેસ એડમિનિસ્ટ્રેશનના જણાવ્યા પ્રમાણે લેન્ડરનું શનિવારે ટચડાઉન થયું હતું. લેન્ડર રોવર ઝુરોંગ સાથે પેરાશૂટની મદદથી નીચે ઉતર્યું હતું અને વાયુમંડળમાંથી સાત મિનિટ બાદ લેન્ડ થયું હતું. આ મંગળના યુટોપિયા પ્લેનિશિયા પર લેન્ડ થયું છે. ચીનના રોવરમાં છ પૈડા છે અને તે સૂર્ય ઉર્જાની મદદથી ચાલે છે. તેનું વજન 240 કિલો છે. આ રોવર મંગળ પર સેમ્પલ એકઠા કરશે અને તેના પર અધ્યયન કરશે. આ અંદાજીત ત્રણ મહિના સુધી કામ કરશે.
મંગળ પર NASA, HOPE
Tianwen-1 ફેબ્રુઆરીમાં મંગળની કક્ષામાં પહોંચ્યું હતું. ફેબ્રુઆરીમાં જ અમેરિકાની સ્પેસ એજન્સી નાસાનું પર્સેવરન્સ રોવર પણ મંગળ પર લેન્ડ થયું હતું. તેણે ત્યાં હવે ટેસ્ટિંગના લાંબા સમય બાદ પોતાનું વૈજ્ઞાનિક કામ પણ શરૂ કરી દીધું છે. નાસાએ એક હેલિકોપ્ટર ઈન્જેન્યુટી પણ મોકલ્યું છે અને પાંચ સફળ ઉડાન પણ પૂરી કરી છે. આ બંને દેશો ઉપરાંત આ વર્ષે યુએઈનું સ્પેસક્રાફ્ટ HOPE પણ મંગળની કક્ષામાં પહોંચ્યું છે જે મંગળની કક્ષામાં ચક્કર લગાવશે અને તેનો એક વિસ્તૃત મેપ તૈયાર કરશે.
કામ પર લાગ્યું છે Tianwen-1 મિશન
લેન્ડિંગ પહેલા Tianwen-1નું ઓર્બિટર ઘણી તસ્વીરો મોકલાવી ચૂક્યું છે. એક વિડીયો Tianwen-1ના સ્મોલ એન્જિનિયરિંગ સર્વે સબ-સિસ્ટમ કેમેરાથી લેવામાં આવ્યો હતો જેમાં ફ્રેમમાં મંગળ આવતો જોવા મળી રહ્યો હતો. ત્યારબાદ મંગળના વાયુમંડળની કિનારી જોવા મળી હતી. બીજા વિડીયોમાં Tianwen-1ના ટ્રેકિંગ એન્ટેનાના મોનિટરિંગ કેમેરાથી લેવામાં આવેલી તસ્વીરો જોવા મળી હતી.