બેઈજિંગઃ ચીનમાં ભારે વરસાદના કારણે ઘણા રાજ્યોમાં પૂરનો પ્રકોપ જોવા મળી રહ્યો છે. પૂરના કારણે અત્યાર સુધી 140થી વધારે લોકોના મૃત્યુ થયા છે. ચીનના ચ્યાંગશી પ્રાંતના પોયાંગહુ ઝીલ ઘાટીમાં ભારે વરસાદ અને પૂરના કારણે 5.1 લાખ લોકો અસરગ્રસ્ત થયા છે. તેમાંથી ચાર લાખ લોકોને સુરક્ષિત સ્થળોએ પહોંચાવામાં આવ્યા છે. આ દરમિયાન અનહુઈ પ્રાંતમાં વરસાદના પાણીનું દબાણ ઓછુ કરવા માટે ચીને એક બંધને ધમાકાથી ઉડાવી દીધો છે.
હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો
પાણીનું દબાણ ઓછુ કરવા માટે ઉડાવ્યો બંધ
ચીનના સરકારી મીડિયા સીસીટીવીના રિપોર્ટ્સ અનુસાર રવિવારે નદીમાં પૂરનું દબાણ ઓછુ કરવા માટે યાંગત્ઝી નદીની સહાયક ચૂહી નદી પર બનેલા બંધને વિસ્ફોટકોથી ઉડાવી દેવામાં આવ્યો છે. આ વર્ષે મૂશળધાર વરસાદના કારણે દક્ષિણ ચીનના યાંગત્ઝી સહિત ઘણી નદીઓના જળસ્તર ખતરાના નિશાન કરતા ઉપર જઈ રહ્યા છે.
ડેમના ગેટ ખોલવાથી પણ પરિસ્થિતિ ન હતી સુધરી
ગત સપ્તાહે ચીને વરસાદના કારણે વધેલા પાણીને ઓછુ કરવા માટે યાંગત્ઝી નદી પર બનેલા થ્રી જોર્જ ડેમના 3 ફ્લડગેટ ખોલી દીધા હતા. કહેવામાં આવી રહ્યું છે કે વરસાદના કારણે આ ડેમનું જળસ્તર પૂરના સ્તર કરતા 15 મીટર ઉપર જતું રહ્યું હતું. સત્તાવાર રિપોર્ટ પ્રમાણે ચીનમાં નાની-મોટી 433 નદીઓમાં પાણી ખતરાના નિશાનથી ઉપર છે.
લાખો હેક્ટરનો પાક બરબાદ થયો
ચીનના સરકારી મીડિયાના જણાવ્યા પ્રમાણે 4.3 લાખ લોકોને પૂરથી અસરગ્રસ્ત વિસ્તારોમાંથી સુરક્ષિત જગ્યાએ પહોંચાડવામાં આવ્યા છે. વરસાદના કારણે 4.5 લાખ હેક્ટરમાં કૃષિ ઉત્પાદનને પણ અસર થઈ છે. ચ્યાંગશી પ્રાંત ઉપરાંત, હુપેઈ અને હુનાન પ્રાંતમાં પણ સ્થિતિ ગંભીર છે.