ચીનમાં કોરોના વકર્યો, પાંચ જ દિવસમાં ઊભી કરી દીધી 1500 રૂમની કોવિડ હોસ્પિટલ

બેઈજિંગઃ ચીનમાં કોરોના વાયરસનો ઉદ્દભવ થયા બાદ તે સમગ્ર વિશ્વમાં ફેલાઈ ગયો છે. જોકે, સૌથી પહેલા કોરોનાનો કહેર ચીનમાં જ ઓછો થઈ ગયો હતો. ચીન સતત દાવો કરતું રહ્યું હતું કે તેના ત્યાં કોરોના નિયંત્રણમાં આવી ગયો છે. પરંતુ ચીન સામે હંમેશા શંકા વ્યક્ત કરવામાં આવી છે તે તેણે પોતાના દેશમાં કોરોનાના કેસ અને મૃત્યુઆંક છૂપાવ્યા છે. જોકે, હવે ચીનમાં ફરીથી કોવિડ-19ના કેસની સંખ્યા વધી રહી છે. જેના કારણે ચીને બેઈજિંગના દક્ષિણ વિસ્તારમાં સરકારે ફક્ત પાંચ જ દિવસમાં 1500 બેડની કોવિડ હોસ્પિટલ તૈયાર કરી લીધી છે, તેમ સરકારી મીડિયાના રિપોર્ટમાં જણાવવામાં આવ્યું છે. આ હોસ્પિટલ હુબેઈ પ્રાંતના નાનગોંગમાં બનાવવામાં આવનારી 6,500 રૂમની છ હોસ્પિટલોમાંની એક છે. આ તમામ હોસ્પિટલો આગામી સપ્તાહમાં તૈયાર થઈ જશે.

અગાઉ આવી જ ઝડપે બની હતી હોસ્પિટલો
ચીનમાં નાનગોંગ અને હુબેઈ પ્રાંતની રાજધાની શિજિયાઝુઆંગમાં કોરોનાના કેસની સંખ્યા ઝડપથી વધી રહી છે. જોકે, ચીનમાં પ્રથમ વખત આટલી ઝડપી હોસ્પિટલ બની હોય તેવું અગાઉ પણ બન્યું હતું. ગત વર્ષે વુહાનમાં કોરોના વાયરસની શરૂઆત થઈ ત્યારે સત્તાધારી કોમ્યુનિસ્ટ પાર્ટી દ્વારા આઈસોલેશન હોસ્પિટલો તૈયાર કરવામાં આવી હતી. વુહાનમાં 2019ના અંતમાં કોરોનાનો પ્રથમ કેસ નોંધાયો હતો.

ચીનમાં વધી રહ્યા છે કોરોનાના કેસો
ચીનમાં ફરીથી કોરોનાના કેસમાં વધારો થઈ રહ્યો છે. નેશનલ હેલ્થ કમિશનના રિપોર્ટ પ્રમાણે શુક્રવારે દેશભરમાં કોવિડ-19ના 130 નવા કેસ નોંધાયા છે જેમાંથી 90 કેસ હેબેઈ પ્રાંતમાં છે. નાનગોંગ અને શિજિઆઝુઆંગમાં 645 દર્દીઓની સારવા ચાલી રહી છે અને તેમાંથી બે કેસ વિદેશથી આવેલા છે. શિજિઆઝુઆંગમાં 3,000 રૂમની કોરોના વાયરસ માટેની હોસ્પિટલ તૈયાર કરવામાં આવી રહી છે જેમાંથી ત્રીજા ભાગનું કન્સ્ટ્રક્શન પૂરુ થઈ ગયું છે. શુક્રવાર સુધીમાં શિજિઆઝુઆંગ પ્રાંતમાં 10 મિલિયન કરતા વધારે લોકોના ટેસ્ટ કરવામાં આવ્યા હતા.

વર્લ્ડ હેલ્થ ઓર્ગેનાઈઝેશનની ટીમને ક્વોરેન્ટીન કરવામાં આવી
બીજી તરફ વર્લ્ડ હેલ્થ ઓર્ગેનાઈઝેશન (ડબલ્યુએચઓ)ની એક ટીમ કોરોનાના ઉદ્દભવની તપાસ કરવા માટે ચીનમાં ગઈ છે. આ ટીમ ગુરૂવારે ચીન પહોંચી હતી અને ટીમને બે દિવસ સુધી ક્વોરેન્ટીન કરવામાં આવી છે. જોકે, ટીમ વિડીયો લિંક દ્વારા ચીનના નિષ્ણાતો સાથે વાતચીત કરે છે.