ચીનમાં કોરોનાની નવી લહેર, હેબેઈથી બેઈજિંગ જવા પર લાગી રોક

બેઈજિંગ: ચીનમાં કોરોનાની નવી લહેરથી હાહાકાર મચી ગયો છે. કોરોના પર જીતનો દાવો કરનાર ચીને કેટલાંક દિવસો પહેલા જ તેના મોટાભાગના શહેરોમાંથી પ્રતિબંધો હટાવી લીધા હતા. નવા વર્ષના પહેલા દિવસે ચીનના ઘણાં શહેરોમાં મોટાસ્તરે પાર્ટીઓનું આયોજન કરવામાં આવ્યું હતું. જેમાં વુહાન શહેરનો પણ સમાવેશ થાય છે.

હવે ફરી એકવખત કોરોના વાયરસની નવી લહેર દરમિયાન ચીનની રાજધાની બેઈજિંગથી દક્ષિણમાં સ્થિત હેબેઈ પ્રાંતમાંથી સંક્રમણના 380થી વધુ કેસ સામે આવ્યા છે. હેબેઈના સ્વાસ્થ્ય અધિકારીઓએ જણાવ્યું કે હવે 40 નવા કેસ સહિત કુલ સંક્રમિતોની સંખ્યા 223 થઈ ગઈ જ્યારે 161 લોકોમાં સંક્રમણના કોઈ લક્ષણ નથી.

હવે ત્યાં હેબેઈ અને બેઈજિંગની વચ્ચેની અવરજવર પર રોક લગાવવામાં આવી છે. હેબેઈથી જે લોકો બેઈજિંગ જવા ઈચ્છે છે તેમણે પ્રવેશ પહેલા રાજધાનીમાં પોતાની કામ કરવાની સાબિતી આપવી પડે છે. હેબેઈમાં આવેલા મોટાભાગના કેસ પ્રાંતિય રાજધાની શિજુઆજુઆંગમાંથી છે જે બેઈજિંગથી આશરે 260 કિમી દક્ષિણ-પશ્ચિમમાં સ્થિત છે. આ બંને શહેરોમાં લાખો લોકોની તપાસ કરવામાં આવી છે અને ત્યાંના રહેવાસીઓને એક અઠવાડિયા સુધી બહાર નીકળવા પર રોક છે. અહીં નોંધનીય છે કે ચીન પર એવા આરોપ પણ લાગતા રહ્યા છે કે તેમણે કોરોનાથી સંક્રમિત લોકોના સાચા આંકડા આજ સુધી જાહેર કર્યા નથી.