ચીની કંપનીનો વિચિત્ર આદેશ, એકથી વધુ વખત ટોઈલેટમાં જશો તો થશે દંડ

ચીનની એક કંપનીએ પોતાના ત્યાં કામ કરતા કર્મચારીઓને વિચિત્ર આદેશ આપ્યો છે. દક્ષિણ ચીનમાં આવેલી આ કંપનીએ કહ્યું કે જો કર્મચારી એક કરતા વધુ વખત ટોઈલેટ બ્રેક લેશે તો તેને દંડ ફટકારવામાં આવશે. ચીની કંપની અંપૂ ઈલેક્ટ્રોનિક સાયન્સ એન્ડ ટેક્નોલોજીનું કહેવું છે કે કર્મચારીઓ આળસુ હોય છે અને તેમની કાર્ય કુશળતા સુધારવા માટે એક કરતા વધુ વખત ટોઈલેટ બ્રેક લેશે તો દંડ ફટકારવામાં આવશે.

ચીનની આ કંપનીએ કર્મચારીઓ પર એકથી વધુ વખત ટોઈલેટ બ્રેક લેતા 20 યુઆનનો દંડ ફટકારવાનું શરૂ કર્યું છે. આ કંપનીએ તારીખ 20 અને 21મી ડિસેમ્બરે 7 કર્મચારીઓને દંડ ફટકાર્યો હતો.

ચીનના જે શહેરમાં આ કંપની આવેલી છે ત્યાંના અધિકારીઓનું આ મુદ્દે ધ્યાન જતા તેમણે સમગ્ર મામલે તપાસ શરૂ કરી છે. અધિકારીઓએ કહ્યું કે આ નિયમ ગેરકાયદેસર છે. તેમણે આ કંપનીને જણાવ્યું કે તેઓ આ નિયમમાં સુધારો કરે અને જે કર્મચારીઓને આ દંડ ફટકારવામાં આવ્યો છે તેઓને તે પરત કરવામાં આવે.

જ્યારે બીજી બાજુ આ કંપનીના મેનેજરે આ મુદ્દે વાત કરતા જણાવ્યું કે આ દંડ કર્મચારીઓના મહિનાના બોનસમાંથી કાપવામાં આવી રહ્યો છે. તેમણે કહ્યું કે કંપનીએ આ નિયમ લાગુ કર્યો છે કારણકે ઘણી વખત કેટલાંક કર્મચારીઓ ટોઈલેટમાં જઈને સિગારેટ પીતા હતા અને કામમાં તેની અસર પડતી હતી. કર્મચારીઓ કામ બાબતે આળસુ હતા અને જ્યારે તેઓને આ વિશે જણાવવામાં આવે તો તેમના પર આ વાતની કોઈ અસર પડતી નહોતી.