ચીનને મળી મોટી સફળતા, ચંદ્રની ધરતી પર સફળતાથી ઉતર્યું અવકાશયાન

બેઈજિંગ: ચીનનું અવકાશયાન યાંગ ઈ-5 મંગળવારે સફળતાપૂર્વક ચંદ્રની ધરતી પર ઉતરી ગયું. ચીનના નેશનલ સ્પેસ એડમિનિસ્ટ્રેશને આ જાણકારી આપી. તેણે જણાવ્યું કે, આ અવકાશયાન ચંદ્રની ધરતી પર પૂર્વ નિર્ધારિત સ્થળની તદ્દન નજીક ઉતર્યું છે. આ મિશનને ચીનના સૌથી શક્તિશાળી રોકેટ લાંગ માર્ચ-5 દ્વારા 24 નવેમ્બરે લોન્ચ કરાયું હતું. આ મિશન દ્વારા ચીન ચંદ્રની ધરતી પરથી માટીના નમૂના ધરતી પર લાવશે.

ચંદ્રની કક્ષામા પહોંચ્યા બાદ ચાંગ ઈ-5એ પોતાના લેન્ડરને તેની ધરતી પર મોકલ્યું જે સુરક્ષિત રીતે પૂર્વ નિર્ધારિત જગ્યા પર લેન્ડ થયું, જ્યારે તેનું ઓર્બિટર ચંદ્રના ચક્કર લગાવી રહ્યું છે. લેન્ડર ચંદ્રની જમીનમાં ખાડો કરી માટી અને પથ્થર કાઢશે. પછી આ નમૂના લઈને અસેન્ડર પાસે જશે. અસેન્ડર નમૂના લઈને ચંદ્રની ધરતી પરથી ઉડશે અને અવકાશમાં ચક્કર મારી રહેલા પોતાના મેઈન યાન સાથે જોડાઈ જશે.

ચીનનુ મુખ્ય અવકાશયાન ચંદ્રની ધરતીના નમૂનાને એક કેપ્સૂલમાં રાખશે અને પછી પૃથ્વી માટે રવાના કરી દેશે. આ સમગ્ર મિશનમાં ઓછામાં ઓછા 23 દિવસ લાગી શકે છે. લગભગ 4 દાયકા બાદ એવુ પહેલી વખત થઈ રહ્યું છે કે, જ્યારે કોઈ દેશ ચંદ્રની ધરતીમાં ખાડો કરી ત્યાંથી પથ્તર અને માટી પૃથ્વી પર લાવવા જઈ રહ્યું છે. આ સમગ્ર મિશનને ચીનનું સૌથી મહત્વકાંક્ષી મિશન કહેવામાં આવી રહ્યું છે.

ચીનનું મિશન જો સફળ થાય છે તો તેની પાસે ચંદ્રની માહિતી વધી જશે અને તેનાથી તેને ચંદ્ર પર વસ્તીઓ ઊભી કરવામા મદદ મળશે. ચીનના અવકાશ યાને ચંદ્ર સુધી પહોંચવા માટે લાંગ માર્ચ-5 રોકેટનો ઉપયોગ કર્યો છે. આ રોકેટ તરલ કેરોસિન અને તરલ ઓક્સીજનની મદદથી ઉડે છે. ચીનનું આ મહાશક્તિશાળી રોકેટ 187 ફૂટ લાંબુ અને 870 ટન વજનનું છે.