ગજબ! ચીનમાં 67 વર્ષની મહિલાએ આપ્યો બાળકીને જન્મ, IVF વિનાં થયાં હતાં પ્રેગનેન્ટ

બેજિંગ: આમ તો 45 વર્ષની ઉંમર બાદ કોઈપણ મહિલા માટે કુદરતી રીતે મા બનવું અશક્ય બની જાય છે, પરંતુ ચીનમાં એક મહિલાએ 67 વર્ષની ઉંમરે કુદરતી રીતે બાળકને જન્મ આપીને સૌને ચોંકાવી દીધા છે. આ મહિલા અને તેના પતિનો દાવો છે કે ઓ IVFની મદદ વિના બાળકના માતાપિતા બન્યાં છે. મહિલાએ ઝાઓઝુઆંગ શહેરની હોસ્પિટલમાં શુક્રવારે સિઝેરિયનથી એક બાળકીને જન્મ આપ્યો હતો. હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો 67 વર્ષની વયે કોઈ મહિલા કુદરતી રીતે માતા બની હોય તેવો દુનિયાનો આ કદાચ પહેલો કિસ્સો છે. જોકે, આ દાવાની સત્યતા ચકાસવાની હજુ બાકી છે. આ પહેલા એક મહિલાએ 57 વર્ષની વયે એક મહિલા કુદરતી રીતે માતા બની હતી. ચીનના સ્થાનિક મીડિયાના જણાવ્યા અનુસાર, તિઆન નામની મહિલાએ 2.56 કિલોગ્રામ વજન ધરાવતી બાળકીને જન્મ આપ્યો છે. જે હોસ્પિટલમાં તેની ડિલિવરી થઈ તેણે તિઆન કુદરતી રીતે માતા બની છે કે કેમ તે અંગે કંઈ કહેવાનો ઈનકાર કરી દીધો હતો. હોસ્પિટલે કહ્યું હતું કે, તિઆનને અહીં લાવવામાં આવી ત્યારે તે પહેલાથી જ પ્રેગનેન્ટ હતી, માટે તે પ્રેગનેન્સી કઈ રીતે રહી તેની માહિતી ન આપી શકે. તિઆને એક લોકલ અખબારને જણાવ્યું હતું કે, તે હેલ્થ ચેકઅપ માટે હોસ્પિટલ ગઈ ત્યારે તેને ખબર પડી હતી કે તે પ્રેગનેન્ટ છે. શરુઆતમાં તે બાળકને રાખવા નહોતી ઈચ્છતી. તેણે પોતાની દીકરીનું નામ તિઆન્સી રાખ્યું છે, જેનો મતલબ સ્વર્ગમાંથી અવતરેલી ભેટ એવો થાય છે. 1977માં ચીને એક બાળકની નીતિ અમલમાં મૂકી તે પહેલા તિઆનને બે બાળકો થઈ ચૂક્યા હતા. હાલ દુનિયાની સૌથી મોટી ઉંમરે માતા બનવાનો રેકોર્ડ ભારતની ઈર્રામતી મંગયમ્માનો છે, તેમણે તાજેતરમાં જ 74 વર્ષની વયે જુડવા બાળકીઓને જન્મ આપ્યો હતો. જોકે, તેમને IVF દ્વારા પ્રેગનેન્સી રહી હતી.