ઈસ્લામાબાદ- પાકિસ્તાનના પૂર્વ વડાપ્રધાન ઈમરાન ખાન(Imran Khan) દ્વારા આયોજિત આઝાદી માર્ચને કારણે બુધવારથી રાજધાની ઈસ્લામાબાદ સળગી રહી છે. પાકિસ્તાનમાં ગૃહ યુદ્ધ જેવી સ્થિતિ સર્જાઈ છે. પાકિસ્તાનની તહરીક એ ઈન્સાફ પાર્ટી(PTI) અને સરકાર વચ્ચે કોઈ પણ પ્રકારની સમજૂતી શક્ય નથી જણાતી. ઈમરાન ખાને સરકારને છ દિવસમાં ચૂંટણીની તારીખની જાહેરાત કરવાનું અલ્ટીમેટમ આપ્યું છે. આ પહેલા સરકારે સુરક્ષા માટે સેના બોલાવી છે. સંવિધાનની કલમ 245 અંતર્ગત પાકિસ્તાનની સરકારે રાજધાનીના રેડ ઝોન વિસ્તારોની સુરક્ષા માટે સેના બોલાવી છે.
પીટીઆઈ અધ્યક્ષ ઈમરાન ખાન અને તેમનો કાફલો રાજધાની ઈસ્લામાબાદ પહોંચી ગયો છે. શહેરના ડી-ચોક વિસ્તાર તરફ તેઓ આગળ વધ્યા ત્યારે સ્થિતિ અનિયંત્રિત થવા લાગી. ઈસ્લામાબાદમાં પોલીસ પ્રવક્તાના જણાવ્યા અનુસાર, પીટીઆઈ કાર્યકર્તાઓએ વિરોધ પ્રદર્શન દરમિયાન હિંસક સ્વરુપ ધારણ કર્યુ હતું. તેમાં અનેક પોલીસકર્મી ઈજાગ્રસ્ત થયા હતા. ઈસ્લામાબાદ પોલીસ તરફથી રેડ ઝોનમાં પ્રવેશ ન કરવાની ચેતવણી કાર્યકર્તાઓને આપી છે.
પાકિસ્તાનમાં કલાકો સુધી ચાલેલા રાજકીય ડ્રામા પછી પૃષ્ટિ થઈ શકી કે સરકાર અને પીટીઆઈ વચ્ચે કોઈ સહમતિ થઈ શકી નથી. પાકિસ્તાનની સુપ્રીમ કોર્ટના આદેશો પછી બન્ને પક્ષો તરફથી વાતચીત કરવામાં આવી પરંતુ કોઈ પરિણામ ન આવી શક્યું. ઈસ્લામાબાદ જતી વખતે હસન અબ્દાલ ખાતે ઈમરાન ખાન કાફલા સાથે રોકાયા હતા, અહીં તેમણે કહ્યું કે જ્યાં સુધી ચૂંટણીની તારીખ જાહેર કરવામાં નહીં આવે ત્યાં સુધી અમે ડી-ચોક નહીં છોડીએ. અમે સરકારને છ દિવસનું અલ્ટીમેટમ આપીએ છીએ. જો ચૂંટણીની જાહેરાત કરવામાં નહીં આવે તો અમે લાખો લોકો સાથે અહીં પહોંચીશું.
પીટીઆઈ કાર્યકર્તાઓ દ્વારા અનેક શહેરોમાં વિરોધ પ્રદર્શન કરવામાં આવ્યું, જેના કારણે પાકિસ્તાનના અનેક શહેરોમાં ઈન્ટરનેટ બંધ કરી દેવામાં આવ્યું. પંજાબના 11 શહેરોમાં ઈન્ટરનેટ સેવા બંધ કરવામાં આવી છે. સત્તાધારી પાર્ટી પાકિસ્તાન મુસ્લિમ લીગ-નવાઝના ઉપાધ્યક્ષ મરિયમ નવાઝે ઈમરાન ખાનની પાર્ટી સાથે કોઈ પણ પ્રકારની સમજૂતી થઈ હોવાની વાતને ફગાવી છે. તેમણે કહ્યું કે, માર્ચને નિષ્ફળ થતી જોઈને તે કેટલા દિવસથી બચીને નીકળી જવાની તક શોધી રહ્યા હતા. આજે જ્યારે લોન્ગ માર્ચ સંપૂર્ણપણે નિષ્ફળ સાબિત થઈ તો તેમણે ધરણાના સ્થાને રેલીનો પ્રસ્તાવ મૂક્યો.