એન્ટાર્કટિકા પણ પહોંચ્યો કોરોના, હવે દુનિયાનો એકપણ ખૂણો બાકી નહીં!

એન્ટાર્કટિકામાં ચિલીના સૈન્ય અને રિસર્ચ બેઝમાં કોરોના વાયરસની એન્ટ્રી થઈ છે. આ સાથે જ વાયરસે દરેક મહાદ્વીપને પોતાની ઝપેટમાં લીધી છે. જનરલ બર્નાર્ડો ઓ હિંગિસ રિકલ્મે બેઝ પર 36 લોકોને સોમવારે કોરોના પોઝિટિવ આવ્યો હતો. એવું માનવામાં આવી રહ્યું છે કે 27 નવેમ્બરમાં ચિલીથી અહીં આવેલી ડિલિવરી સાથે જ વાયરસની પણ એન્ટ્રી થઈ હતી.

36 લોકોનો કોરોના રિપોર્ટ પોઝિટિવ
કોરોના પોઝિટિવ લોકોમાં 26 સૈન્યકર્મચારીઓ છે જ્યારે 10 અન્ય કોન્ટ્રાક્ટરનો સમાવેશ થાય છે. જે સમારકામનું કામ કરે છે. ચિલીની સેનાનું કહેવું છે કે દરેક બીનજરુરી સ્ટાફને પરત બોલાવવામાં આવ્યો છે. એવું માનવામાં આવે છે કે બેઝ પર 60 લોકો રહી શકે છે. જેમાં વૈજ્ઞાનિકોનો પણ સમાવેશ થાય છે. અહીં કુલ 24 કોન્ટ્રાક્ટર્સ કામ કરી રહ્યાં છે.

એન્ટાર્કટિકામાં પણ ઘૂસ્યો કોરોના
અત્યાર સુધીમાં માત્ર એન્ટાર્કટિકા જ દુનિયાનો એવો ખૂણો હતો જ્યાં ઘાતક કોરોના વાયરસની એન્ટ્રી નહોતી થઈ. જે દુનિયાભરમાં 8 કરોડ લોકોને પોતાનો શિકાર બનાવી ચૂક્યો છે. આ મહામારીને જોતા પર્યટન સ્થળને પણ બંધ કરવામાં આવ્યા હતાં. ત્યાં સુધી કે આશરે 70% બેઝ પણ બાકીની દુનિયાથી સંપર્કવિહોણા થઈ ગયા હતાં. જેથી દરેકનું કામ પણ રોકાયેલું છે.

ચિલીમાં 16000થી વધુના મોત
દુનિયાભરમાં આશરે 17 લાખથી વધારે લોકોના મોત થઈ ચૂક્યા છે ત્યાં ચિલીમાં 589,189 લોકો કોરોના વાયરસની ઝપેટમાં આવી ચૂક્યાં છે. અહીં 16000થી વધારે લોકોના મોત થઈ ચૂક્યા છે. વાયરસનો સામનો કરવા માટે દુનિયાભરની મોટી ફાર્મા કંપનીઓ વેક્સીન બનાવવામાં લાગી છે અને અમેરિકા તેમજ બ્રિટનમાં ટ્રાયલની બહાર Pfizerની વેક્સીન આપવાનું કામ પણ શરુ થઈ ચૂક્યું છે. અમેરિકામાં Modernaની વેક્સીન પણ આપવામાં આવી રહી છે.