ઓક્સફોર્ડ એક્સપર્ટનો દાવોઃ સપ્ટેમ્બર સુધી આવશે નવા વેરિયન્ટ્સ પર અસરકારક વેક્સીન

લંડનઃ કોરોના વાયરસને માત આપવા માટે ઘણી વેક્સીન તૈયાર કરવામાં આવી છે. જોકે, તે વાયરસના નવા વેરિયન્ટ્સ પર અસરકારક થશે કે નહીં તેને લઈને ઘણા લોકો શંકા વ્યક્ત કરી રહ્યા છે. જોકે, ઓક્સફોર્ડ વેક્સીન ચીફ એન્ડ્રુ પોલાર્ડે જણાવ્યું છે કે વાયરસના નવા વેરિયન્ટ્સ પર અસરકારક વેક્સીન સપ્ટેમ્બર સુધીમાં તૈયાર થઈ શકે છે. જોકે, તેમણે સ્પષ્ટતા કરી છે કે વર્તમાન વેક્સીન પણ એટલી જ અસરકારક છે.

પ્રોફેસર પોલાર્ડે જનતાને વેક્સીન લેવા માટે સલામ પણ કરી છે. તેમણે કહ્યું છે કે પબ્લિક હેલ્થ ડેટાથી ખ્યાલ આવે છે કે 30 લાખ ડોઝ આપીને ઓછામાં ઓછી 10,000 લોકોનો જીવ બચાવવામાં આવ્યા છે.

તેમણે કહ્યું હતું કે એક વર્ષ પહેલા વિચારવું મુશ્કેલ હતું કે આવું પણ થઈ શકે છે. પ્રોફેસર પોલાર્ડે કહ્યું હતું કે બ્રિટનમાં પરિસ્થિતિ સારી છે પરંતુ દુનિયાના બીજા ભાગોમાં વેક્સિનને લઈને ચર્ચાના કારણે મુશ્કેલી છે. ઓક્સફોર્ડ-એસ્ટ્રાઝેનેકાની વેક્સીનના કારણે બ્લડ ક્લોટિંગની સમસ્યા જોવા મળ્યા બાદ જર્મની, ફ્રાન્સ, ઈટાલી, સ્પેન અને નેધરલેન્ડ જેવા દેશોએ તેના પર પ્રતિબંધ મૂક્યો છે.

જોકે, પ્રોફેસર પોલાર્ડે કહ્યું હતું કે બ્લડ ક્લોટિંગ થવાના કેસ ઘણા ઓછા બન્યા છે અને લોકોએ ખતરાના બદલે ફાયદા તરફ જોવું જોઈએ. સૌથી મોટો ખતરો વેક્સીન ન લગાવવાનો છે. તેમણે સ્પષ્ટ કર્યું છે કે વેક્સીન નવા વેરિયન્ટ પર 100 ટકા અસરકારક રહેશે તે કહેવું મુશ્કેલ છે પરંતુ ગંભીર બીમારીઓને ચોક્કસથી રોકી શકશે.

પ્રોફેસર પોલાર્ડે તે પણ કહ્યું છે કે આપણે મુશ્કેલમાંથી મુશ્કેલ સમય માટે તૈયાર રહેવું પડશે. જ્યારે કોઈ આવો વાયરસ હોય જેના માટે ફરીથી વેક્સિનેટ થવાની જરૂર પડશે. જોકે, તેમણે આશા વ્યક્ત કરી છે કે તેવામાં રોગચાળો આટલો ભયાનક ન હોય. તેઓ તેને લઈને વધારે હકારાત્મક છે.