કોરોના કર્ફ્યૂનો ભંગ કર્યો, પોલીસે 300 ઉઠ-બેસ કરાવતા યુવકનું મોત

ફિલિપાઈન્સમાં એક યુવકે કોરોના નિયમનો ભંગ કરતા પોલીસે તેને 300 ઉઠ-બેસ કરવાની સજા આપી હતી અને ત્યારબાદ તેનું મોત થયું હતું. જનરલ ટ્રિયાસ શહેરના 28 વર્ષીય યુવક ડેરેન માનાઓગ પેનારેડોન્ડો કર્ફ્યૂ દરમિયાન સાંજે છ વાગ્યે એક દુકાનમાં પાણીની બોટલ લેવા માટે ગયો હતો.

તેની પાર્ટનર રેઈચેલીન બાલ્સે જણાવ્યું હતું કે પેનારેડોન્ડો અને કોરોના નિયમ તોડનારા કેટલાક અન્ય લોકોના ગ્રૂપને 100 સ્ક્વોટ કરવાની સજા આપવામાં આવી હતી. પરંતુ જો તેઓ એક સાથે તે સ્ક્વોટ કરવામાં નિષ્ફળ રહે તો તેમને ફરીથી સ્ક્વોટ કરવા પડ્યા હતા. પેનારેડોન્ડો બીજા દિવસે સવારે ઘરે આવ્યો હતો અને બાલ્સે જણાવ્યું હતું કે તેણે 300 સ્ક્વોટ કર્યા હતા અને ચાલી શકવાની સ્થિતિમાં પણ ન હતો.

ડેઈલી મેલના અહેવાલ પ્રમાણે બાલ્સે સ્થાનિક ન્યૂઝ સાઈટને જણાવ્યું હતું કે, જ્યારે તે સવારે 8 વાગ્યે ઘરે આવ્યો હતો. કોરોના નિયમનો ભંગ કરનારા અન્ય એક વ્યક્તિએ તેને ઘરે સુધી મદદ કરી હતી. મેં તેને પૂછ્યું હતું કે શું પોલીસે તને માર માર્યો છે ત્યારે તેણે ફક્ત એક સ્મિત આપ્યું હતું. પરંતુ તેને ઘણી પીડા થઈ રહી હતી.

તે ઊભો રહેવા પણ સક્ષમ ન હતો. તેના પગમાં ઘણી પીડા થઈ રહી હતી અને તેથી તે ઘસડાતો-ઘસડાતો એક જગ્યાએથી બીજી જગ્યાએ જતો હતો. તે બાથરૂમ જવા ગયો હતો ત્યારે તે ઢળી પડ્યો હતો પરંતુ પાડોશીએ તેને સીપીઆરની મદદથી ભાનમાં લાવ્યો હતો. ત્યારબાદ તે થોડો સમય સુધી ભાનમાં રહ્યો હતો અને બાદમાં રાત્રે 10 વાગ્યે તેનું મોત થયું હતું. તેને હોસ્પિટલ પણ લઈ જવાનો સમય મળ્યો ન હતો, તેમ તેણે જણાવ્યું હતું.

લોકલ વિલેજ ગાર્ડ યુનિટ્સના વડા રોડોલ્ફો ક્રુઝ જૂનિયરે જણાવ્યું હતું કે, 1 એપ્રિલે કોરોના કર્ફ્યૂનો ભંગ કરવા બદલ પેનારેડોન્ડોની ધરપકડ કરવામાં આવી હતી. જોકે, તેને તરત જ મ્યુનિસિપલ પોલીસને સોંપી દેવામાં આવ્યો હતો.

સ્થાનિક પોલીસ ફોર્સના વડા લેફ્ટનન્ટ કર્નલ માર્લો સોલેરોએ કર્ફ્યૂનો ભંગ કરવા બદલ સ્ક્વોટની સજા કરવાની વાતને નકારી કાઢી હતી અને કહ્યું હતું કે, પોલીસ અધિકારીઓ કર્ફ્યૂનો ભંગ કરનારા લોકોને પકડીને તેમને સમજાવતા હોય છે. જો આ કેસમાં પોલીસ દોષિત ઠરશે તો ચોક્કસથી તેમની સામે પગલાં લેવામાં આવશે.