બગદાદમાં કોવિડ હોસ્પિટલમાં ઓક્સિજન ટેન્કમાં ધડાકા બાદ લાગેલી આગમાં 82ના મોત

બગદાદઃ ઈરાકના બગદાદની એક હોસ્પિટલ ખાતે સ્પાર્ક થતાં ઓક્સિજન ટેન્કમાં બ્લાસ્ટ થતાં 82 લોકોના મોત થયા છે જ્યારે 110 લોકો ઈજાગ્રસ્ત થયા છે. આ હોસ્પિટલમાં કોરોનાના દર્દીઓની સારવાર આપવામાં આવી રહી હતી. ઈન્ટિરિયલ મિનિસ્ટ્રીના પ્રવક્તા ખાલિદ-અલ-મુહાન્નાએ જણાવ્યું હતું કે, આવી ઘટનાઓ ભવિષ્યમાં ન બને તે માટે આપણે તાત્કાલિક તમામ હોસ્પિટલોમાં સુરક્ષા વ્યવસ્થાની સમીક્ષા કરવાની જરૂર છે.

ડિયાલા બ્રિજ વિસ્તારમાં આવેલી ખાતિબ હોસ્પિટલમાં શનિવારે આગ લાગી હતી. ઘટનાને નજરે જોનારા એક વ્યક્તિએ જણાવ્યું હતું કે લોકો બચવા માટે બારીઓમાંથી કૂદી રહ્યા હતા. હોસ્પિટલ સ્ટાફ અને સ્થાનિકો આ બ્લાસ્ટમાં ઈજાગ્રસ્ત થયેલા લોકોને બચાવવા માટે દોડી રહ્યા હતા. મોટી સંખ્યામાં એમ્બ્યુલન્સ હોસ્પિટલ ખાતે આવી પહોંચી હતી અને જે લોકો ઈજાગ્રસ્ત હતા તેમને સારવાર આપવામાં આવી હતી.

સૂત્રોએ જણાવ્યું હતું કે, ઓસ્કિજન સિલિન્ડર સ્ટોરેજમાં ફોલ્ટ થતાં બ્લાસ્ટ થયો હતો. બ્લાસ્ટ થયા બાદ આગ ઝડપથી પ્રસરી હતી. હોસ્પિટલમાં ફાયર સેફ્ટી પૂરતા પ્રમાણમાં ન હતી અને સિલિંગ બનાવવામાં ઝડપથી આગ પ્રસરે તેવા ઉત્પાદનોનો ઉપયોગ કરવામાં આવ્યો હતો. સિવિલ ડિફેન્સે જણાવ્યું હતું કે, મોટા ભાગના પીડિતો મરી ગયા કારણ કે તેમને અન્યત્ર ખસેડવા માટે વેન્ટિલેટર પરથી લઈ લેવામાં આવ્યા હતા જ્યારે કેટલાક લોકોએ ધૂમાડાથી થયેલી ગૂંગળામણના કારણે જીવ ગુમાવ્યો હતો.

ઘટના સ્થળે હાજર દર્દીના એક સગાએ જણાવ્યું હતું કે, શરૂઆતમાં એક ધડાકો થયો હતો અને બાદમાં આગ ફેલાઈ ગઈ હતી. તેમણે કહ્યું હતું કે, મારો ભાઈ હોસ્પિટલમાં દાખલ હતો. ધૂમાડો તેના સુધી પહોંચી ગયો હતો અને હું તેને બહાર લાવ્યો હતો. બાદમાં હું અંદર ગયો હતો ત્યારે મેં એક છોકરી જોઈ હતી જેને ગૂંગળામણ થઈ રહી હતી. 19 વર્ષીય છોકરી મરી જાય તેવી સ્થિતિમાં હતી. મેં તેને મારા ખભે ઊચકી લીધી હતી અને બહાર દોડી આવ્યો હતો. લોકો બારીમાંથી કૂદી રહ્યા હતા.