USમાં ટ્રમ્પ બળવાની તૈયારીમાં? રાતોરાત પેન્ટાગોનના ટોચના અધિકારીમાં મોટા ફેરફાર

વૉશિંગ્ટનઃ અમેરિકાના પ્રમુખ ડોનાલ્ડ ટ્રમ્પ હાર માનવા તૈયાર નથી. તેઓ હજુ પણ એ વાત પર યથાવત છે કે યુ.એસ. ચૂંટણીમાં ધાંધલધમાલ કરવામાં આવી છે. ટ્રમ્પ સતત સોશિયલ મીડિયા પર ચૂંટણી પ્રક્રિયા અને જો બાઇડેનની જીત પર સવાલ ઉભા કરે છે. આ દરમિયાન એવી અટકળો ચાલી રહી છે કે રાષ્ટ્રપતિ ડોનાલ્ડ ટ્રમ્પ વિશ્વની અગ્રણી લોકશાહીને ઉથલાવવાનો પ્રયાસ કરી રહ્યા છે? ટ્રમ્પ વહીવટ વતી સંરક્ષણ વિભાગમાં મોટા પાયે ફેરફાર કરવામાં આવી રહ્યા છે. પેન્ટાગોનના નાગરિક નેતૃત્વમાં ઝડપી પરિવર્તનથી ચિંતાની સ્થિતિ ઊભી થઈ છે. ટ્રમ્પ વહીવટ પેન્ટાગોનના સૌથી વરિષ્ઠ અધિકારીઓને દૂર કરી રાષ્ટ્રપતિના વફાદારોને તેની જગ્યાએ નિમણૂંક કરી રહ્યા છે. આ પહેલા સોમવારે ડોનાલ્ડ ટ્રમ્પે સંરક્ષણ પ્રધાન માર્ક એસ્પરને તેમના પદ પરથી હટાવી દીધા હતા.

હકીકતમાં, એક તરફ ડોનાલ્ડ ટ્રમ્પે હજુ સુધી પોતાની ઇનિંગ પૂર્ણ થયાની ઘોષણા કરી નથી, તો બીજી તરફ જો બિડેન સત્તા પરિવર્તનની તેમની યોજના પર આગળ વધવાનું શરૂ કરી દીધું છે. આવી સ્થિતિમાં ટ્રમ્પ સાથે સંમત થતાં અમેરિકાના હાલના વિદેશ મંત્રી પોમ્પિયોએ કહ્યું છે કે - સત્તા હસ્તાંતરણ શાંતિપૂર્ણ રીતે કરવામાં આવશે અને ડોનાલ્ડ ટ્રમ્પ પ્રશાસન જ તેની બીજી મુદત શરૂ કરશે. તમને જણાવી દઈએ કે વડા પ્રધાન નરેન્દ્ર મોદી સહિત વિશ્વના ઘણા નેતાઓ બાઇડનને વિજય માટે અભિનંદન આપી ચૂક્યા છે.

સર્વેમાં 79 લોકોએ માન્યું બાઇડન જીતી ચૂક્યા છે ચૂંટણી

આ આખી ઘટના ત્યારે પણ પ્રકાશમાં આવી હતી જ્યારે ટ્રમ્પે આગ્રહપૂર્વક કહ્યું કે તેઓ ચૂંટણી જીતી ગયા છે કે ફેર ગણતરી પછી પણ તેઓ જ જીતશે. તેમજ પોતની જીત ઉપરાંત જો કોઇ પણ પરિણામ સામે આવે છે તો તે ચૂંટણીમાં છેડછાડનો સીધો સંકેત છે. બીજી તરફ મતદાન અધિકારીઓનું કહેવું છે કે ચૂંટણીમાં મોટા પાયે છેતરપિંડી થયાના કોઈ પુરાવા નથી. મતદાન પછીના સર્વેક્ષણો દર્શાવે છે કે 79 ટકા લોકો માને છે કે બાઇડન ચૂંટણી જીત્યા છે, 13 ટકા લોકોએ કહ્યું હતું કે ચૂંટણીનો નિર્ણય હજી સુધી નક્કી નથી થયો, અને માત્ર 3 ટકા લોકોએ કહ્યું હતું કે ટ્રમ્પ જીત્યા છે. ચૂંટણી પ્રક્રિયામાં સામેલ રાજ્ય કક્ષાના રિપબ્લિકન અધિકારીઓ પણ કહે છે કે કોઈ નોંધપાત્ર છેતરપિંડીના પુરાવા નથી, જે ચૂંટણીના પરિણામોને બદલશે, આ માત્ર સ્પષ્ટ બળવો છે.

ટ્રમ્પની ભત્રીજી બોલી- બળવાની તૈયારીમાં છે ટ્રમ્પ

ટ્રમ્પ તરફથી બળવો કરવાનો પ્રયાસ એ હકીકત પરથી પણ લગાવી શકાય છે. રાષ્ટ્ર પ્રમુખ ડોનાલ્ડ ટ્રમ્પની ભત્રીજી મેરી ટ્રમ્પે ટ્વીટ કર્યું હતું કે રાષ્ટ્ર પ્રમુખની ચૂંટણીમાં જો બાઇડન કાયદેસર અને નિર્ણાયક રીતે જીત્યા છે. ડોનાલ્ડ ટ્રમ્પ અને તેના લોકો ગમે તેટલું જૂઠું બોલે અને આરોપ મૂકે, કંઈ પણ બદલાશે નહીં. ચેતતા રહો - આ બળવાનો પ્રયાસ છે.

24 કલાકમાં હટાવાયા અનેક અધિકારી

માર્ક એસ્પરને હટાવ્યાના 24 કલાક પછી, પેન્ટાગોનમાં અધિકારીઓ પર કડક કાર્યવાહી કરવાનું શરૂ કર્યું. ત્યારથી લશ્કરી નેતૃત્વ અને નાગરિક અધિકારીઓમાં ચિંતા છે. તેમને ચિંતા છે કે આગામી દિવસોમાં શું થશે. એસ્પરને હટાવ્યા બાદ ચાર વરિષ્ઠ નાગરિક અધિકારીઓને બરતરફ કરવામાં આવ્યા છે.

ઓબામાને આતંકી કહેવાવાળાને ટ્રમ્પે આપ્યું મોટું પદ

એસ્પર સાથે તેમના ચીફ ઓફ સ્ટાફ અને ઉચ્ચ અધિકારીઓને દૂર કરવામાં આવ્યા છે, જે નીતિ અને ગુપ્તચર સંબંધિત મુદ્દાઓ પર નજર રાખતા હતા. ટ્રમ્પના વફાદારોને તેમની જગ્યાએ લાવવામાં આવ્યા છે. ત્યાં સુધી કે આતંકવાદીઓ સાથે કાવતરું ઘડવાના આરોપિત એક અધિકારીને પણ બઢતી આપવામાં આવી છે. આ અધિકારીએ ભૂતપૂર્વ રાષ્ટ્રપ્રમુખ બરાક ઓબામાને પણ આતંકી ગણાવ્યા હતા.

'ટ્રમ્પ દ્વારા હાર સ્વીકાર ન કરવી શરમજનક'

અમેરિકાના નવા ચૂંટાયેલા રાષ્ટ્ર પ્રમુખ જો બાઇડને મંગળવારે કહ્યું કે દેશના વિદાય લેનારા રાષ્ટ્ર પ્રમુખ ડોનાલ્ડ ટ્રમ્પ દ્વારા તાજેતરમાં થયેલી ચૂંટણીમાં હાર ન સ્વીકારવી શરમજનક છે. તેમણે કહ્યું કે ટ્રમ્પ દ્વારા હાર સ્વીકાર ન કરવાથી સત્તાના હસ્તાંતરણની તેમની યોજના પર કોઈ અસર નહીં થાય અને તેઓએ વિશ્વના નેતાઓ સાથે વાત કરવાનું શરૂ કરી દીધું છે. પત્રકારોના ટ્રમ્પ અંગે પૂછાયેલા પ્રશ્નના જવાબમાં, બાઇડને 20 જાન્યુઆરીએ બધુ બરાબર થવાની આશા દર્શાવી હતી. અમેરિકાના મોટા મીડિયા નેટવર્ક પણ 3 નવેમ્બરના રોજ યોજાયેલી ચૂંટણીઓમાં જો બાઇડનને વિજેતા તરીકે દર્શાવી ચૂક્યા છે.