ડોનાલ્ડ ટ્રમ્પે H-1B વીઝા પરનો પ્રતિબંધ લંબાવ્યો, ભારતીયોને પડશે મુશ્કેલી

વોશિંગ્ટન: અમેરિકાના પ્રેસિડન્ટ ડોનાલ્ડ ટ્રમ્પે H-1B વીઝાને લઈને મોટો નિર્ણય લીધો છે. ડોનાલ્ડ ટ્રમ્પે અન્ય વિદેશી વર્ક વીઝા પર લગાવાયેલા પ્રતિબંધોને ત્રણ મહિના માટે વધારી લીધા છે. એટલે કે, હવે આ પ્રતિબંધો 31મી માર્ચ સુધી લાગુ રહેશે. આ નિર્ણયથી મોટી સંખ્યામાં ભારતીય આઈટી કંપનીઓમાં કામ કરી રહેલા લોકો, ઘણી અમેરિકા અને ભારતીય કંપનીઓ પ્રભાવિત થશે, જેમને અમેરિકાની સરકારે એચ-1બી વીઝા આપ્યા હતા.

અમેરિકામાં કામ કરતી કંપનીઓ જો કોઈ વિદેશી વ્યક્તિને નોકરી આપવા ઈચ્છે છે તો કર્મચારી એચ-1બી વીઝા લઈને જ અમેરિકામાં કોઈ કંપનીમાં કામ કરી શકે છે. ભારતમાંથી મોટી સંખ્યામાં આઈટી પ્રોફેશનલ્સ એચ-1બી વીઝા લઈને અમેરિકામાં કામ કરવા જાય છે. અમેરિકાના પ્રેસિડન્ટે જણાવ્યું કે, જે કારણોથી પ્રતિબંધ લગાવાયો હતો, તે બદલાયા નથી. એટલે નિર્ણયને ફેરવાયો નથી.

ટ્રમ્પે ગત વર્ષે 22 એપ્રિલ અને 22 જૂને જુદા-જુદા વર્ગના વર્ક વીઝા પર પ્રતિબંધ લગાવવાનો આદેશ આપ્યો હતો. આ આદેશ 31 ડિસેમ્બર 2020એ પૂરો થઈ રહ્યો હતો અને તેના થોડા કલાકો પહેલા જ ટ્રમ્પે ગુરુવારે આ પ્રતિબંધને 31 માર્ચ સુધી વધારવાની જાહેરાત કરી છે. ટેકનોલોજી કંપનીઓ ભારત અને ચીન જેવા દેશોમાંથી દર વર્ષે હજારોની સંખ્યામાં કર્મચારીઓને નિયુક્ત કરવા માટે આ વીઝા પર નિર્ભર છે. આ નિર્ણયથી પોતાના એચ-1બી વીઝા રિન્યુ થવાની રાહ જોઈ રહેલા ભારતીય પ્રોફેશનલ્સને પણ અસર પડશે.

જણાવી દઈએ કે, આ વીઝાની ડિમાન્ડ એ કારણે પણ વધારે છે કે, વીઝા ધારક પોતાના પતિ/પત્ની અને બાળકોને અમેરિકા લાવી શકે છે અને પોતાના વીઝા હોય તેટલો સમય અમેરિકામાં રાખી શકે છે. આ વીઝાનું સૌથી મોટું આકર્ષણ એ છે કે આ વીઝા માટે મોટી ડિગ્રીની જરૂર નથી, માત્ર બેચલર ડિગ્રી અને અમેરિકામાં કામ કરતી કોઈપણ કંપનીમાંથી ઓફર લેટર જ જરૂરી છે. આ ઉપરાંત આ વીઝા પૂરા થયા પછી સ્થાયી નાગરિકતા માટે અરજી કરી શકાય છે અને ગ્રીન કાર્ડ મેળવી શકાય છે. જો એચ-1બી વીઝા પૂરા થયા બાદ ગ્રીન કાર્ડ ન મળે તો અરજી કરનારે આગામી એક વર્ષ માટે અમેરિકાની બહાર રહેવું પડે છે અને તે પછી ફરીથી એચ-1બી વીઝા માટે અરજી કરવાની રહે છે.