4 વર્ષના કાર્યકાળમાં 20,000 કરતા વધુ વખત જૂઠ્ઠું બોલ્યા ડોનાલ્ડ ટ્રમ્પ

વોશિંગ્ટન: ડોનાલ્ડ ટ્રમ્પ પોતાના ચાર વર્ષના રાષ્ટ્રપ્રમુખ પદના કાર્યકાળમાં 20,000 કરતા વધુ વખત જૂઠ્ઠું બોલ્યા છે. ફેક્ટચેક કરતી વેબસાઈટ PolitiFactના અનુસાર વર્ષ 2016થી અત્યાર સુધીમાં ડોનાલ્ડ ટ્રમ્પના અડધા કરતા વધારે નિવેદન ખોટા હતા.

ડોનાલ્ડ ટ્રમ્પે પોતાના ચાર વર્ષના કાર્યકાળમાં ઓછામાં ઓછા 407 વખત દાવો કર્યો છે કે તેમણે સૌથી મજબૂત અમેરિકન અર્થવ્યવસ્થાનું નિર્માણ કર્યું છે. પરંતુ, સત્ય એ છે કે ડોનાલ્ડ ટ્રમ્પના કાર્યકાળ કરતા વધારે મજબૂત અર્થવ્યવસ્થા લિંડન બી જ્હોન્સન, બિલ ક્લિન્ટન, આઈઝનહાવર (Dwight D. Eisenhower)ના સમયમાં રહી હતી.

મેક્સિકો બોર્ડર પર દીવાલ ચણવાનો દાવો (262 વખત)

ડોનાલ્ડ ટ્રમ્પે રાષ્ટ્રવાદી વિચારધારાને હવા આપવા માટે પોતાના કાર્યકાળની શરૂઆતથી જ મેક્સિકો બોર્ડર પર ગેરકાયદે પ્રવાસીઓને ઘૂસતા રોકવા માટે મોટી દીવાલ બનાવવાની જાહેરાત કરી હતી. તેઓ વારંવાર કહેતા હતા કે જલદી જ આ દીવાલની નિર્માણનું કામ પૂરું થશે. પરંતુ, વાસ્તવિકતા એ છે કે હવે એક કોંક્રિટની દીવાલ બનાવવાનું કામ શરૂ થયું છે. અને ત્યાં પહેલાથી જ હતી તે વાડનો કેટલોક હિસ્સો વધારાયો છે.

રશિયાની સાથે કોઈ ડીલ નથી થઈ (236 વખત)

ડોનાલ્ડ ટ્રમ્પ ચૂંટણીથી લઈને અત્યાર સુધી કહેતા આવ્યા છે કે વર્ષ 2016ની પ્રેસિડેન્ટ માટેની ચૂંટણીમાં તેમની રશિયાની સાથે કોઈ ડીલ નહોતી થઈ. પણ, મૂલરના રિપોર્ટમાં એવો દાવો કરાયો હતો કે ટ્રમ્પની જીત થાય તે માટે તેમના રશિયન સહયોગીઓએ હિલેરી ક્લિન્ટનને બદનામ કરવાનું ષડયંત્ર રચ્યું હતું. પરંતુ, કોર્ટમાં મૂલર આ વાત સાબિત કરી શક્યા નહોતા.