લગ્નમાં મહેમાનોની લિમિટેડ સંખ્યા: મૂળ ભારતીય પટેલ કપલે કર્યા 'ડ્રાઈવ-ઈન' વેડિંગ

બ્રિટનમાં કોરોના વાયરસના વધતા જતા કેસોને કારણે લોકડાઉનના નિયમો સખત બનાવવામાં આવ્યા છે. જેના કારણે જાહેર કાર્યક્રમો, લગ્ન વગેરેમાં મહેમાનોની સંખ્યા પણ મર્યાદિત કરવામાં આવી છે. જોકે, ભારતીય મૂળના એક કપલે આ 'ગાઈડલાઈન'નો પણ ઉપાય કાઢ્યો હતો અને ખુલ્લા મેદાનમાં ચાલતી કારમાં તેમના લગ્નનું આયોજન કર્યું હતું. આવા કાર્યક્રમને 'ડ્રાઇવ ઈન' કહેવામાં આવે છે. જેનાથી લગ્નમાં આવતા મહેમાનોની સંખ્યા પર 'પ્રતિબંધનો નિયમ' અસર કરતો નથી.

પહેલા 20 એપ્રિલે થવાના હતા લગ્ન
લંડનમાં રહેતા રોમા પોપટ અને વીનલ પટેલના લગ્ન પહેલા 20 એપ્રિલે થવાના હતાં. પરંતુ, તે જ સમયે કોરોના વાયરસના વધતા જતા કેસોને કારણે લંડનમાં લોકડાઉનની જાહેરાત કરવામાં આવી હતી. જેના કારણે તેમના લગ્નનો પ્લાન નિષ્ફળ રહ્યો હતો. જ્યારે આ કપલને લાગ્યું કે, કોરોના વાયરસની સ્થિતિ તો હજુ લાંબો સમય ચાલુ રહેવાની છે ત્યારે તેમણે વેડિંગ કોઓર્ડિનેટર સાથે ચર્ચા કરી.

ડ્રાઈવ ઈન લગ્નમાં સામેલ થયા સેંકડો લોકો
જે પછી તેમણે ગત શુક્રવારે ચેલ્મ્સફોર્ડના બ્રેક્સ્ટેડ પાર્કમાં 'ડ્રાઈવ ઇન વેડિંગ'નું આયોજન કર્યું હતું. આ દરમિયાન 100 કારમાં તેમની નજીકના લોકો પહોંચ્યા હતાં. ખુલ્લી જગ્યામાં કારની અંદર જ રહેવાને કારણે સરકારના આદેશનું પણ કોઈ ઉલ્લંઘન થયું નહીં અને તમામ મહેમાનો આરામથી આ ભારતીય મૂળના કપલના લગ્નમાં હાજરી આપી શક્યા હતાં. લગ્નના કાર્યક્રમનું પ્રસારણ કરવા માટે તેમણે પાર્કમાં એક મોટી સ્ક્રીન પણ મૂકી હતી.

લગ્નમાં માત્ર 15 લોકોને જ અનુમતિ
બ્રિટિશ સરકારની ગાઈડલાઈન હેઠળ ફક્ત 15 લોકોને લગ્ન આયોજનમાં ભાગ લેવાની મંજૂરી છે. આ કારણોસર ઘણા લોકોએ લગ્ન સ્થગિત કરી દીધા છે. કેટલાક લોકો એવા પણ છે કે જેઓ તેમના લગ્નમાં ફક્ત નજીકના મિત્રો અને સંબંધીઓને જ આમંત્રણ આપે છે. બાકી લોકોને લાઈવ ટેલિકાસ્ટ સોશિયલ મીડિયા અથવા અન્ય માધ્યમ દ્વારા બતાવવામાં આવી રહ્યાં છે.

બ્રાઈડે કહ્યું-ક્યારેય નહીં ભૂલીએ આ દિવસ
બ્રાઈડ રોમાએ કહ્યું કે, જ્યારે અમારે લગ્ન એપ્રિલમાં મુલતવી રાખવાના હતા, ત્યારે અમને ખબર જ નહોતી કે આ વર્ષે અમારા લગ્ન થશે કે નહીં.! અમારા અઢળક દોસ્ત અને કુટુંબ છે અને અમે ઇચ્છતા હતા કે તેઓ અમારી ઉજવણીનો એક ભાગ બને. અમારી પાસે બધું હોવા છતાં અમે જે વિચાર્યું તેવું તો થઈ ન શક્યું પરંતુ આ એવો દિવસ હતો જેને અમે ક્યારેય ભૂલીશું નહીં.