ચીનમાં 120 કરોડ લોકો પાસે છે માત્ર 100 સરનેમ! સૌથી વધુ પોપ્યુલર છે આ 5 સરનેમ

દરેક વ્યક્તિના નામની સાથે તેની સરનેમ જોડાયેલી હોય છે, આ સરનેમથી જે-તે વ્યક્તિની ઓળખ થતી હોય છે. એવું પણ જોવા-જાણવા મળે છે કે એક જ પ્રકારનું નામ-સરનેમ ધરાવતા એક કરતા વધારે વ્યક્તિ હોય. પણ, ચીન દેશમાં એવી 5 સરનેમ છે જે દેશની 30 ટકા વસ્તી એટલે કે 43 કરોડ કરતા વધુ લોકોએ અપનાવી છે. આ પાંચ સરનેમ વાંગ, લી, ઝાંગ, લિઉ અથવા ચેન (Wang, Li, Zhang, Liu or Chen) છે. ચીનમાં સરનેમની અછત સર્જાઈ છે, ચીનના લોકસુરક્ષા મંત્રાલયના ડોક્યુમેન્ટ્સના વિશ્લેષણ દરમિયાન આ જાણકારી મળી છે.

આ ડોક્યુમેન્ટ્સના જણાવ્યા મુજબ, વર્ષ 2010ની વસ્તી ગણતરીની સરખામણીમાં ચીનની 86 ટકા વસ્તી વચ્ચે માત્ર 100 સરનેમ લોકપ્રિય છે. એક રિપોર્ટ મુજબ, ચીનમાં અગાઉ 23,000 સરનેમ પ્રચલિત હતી જે હવે ઘટીને 6,000 રહી ગઈ છે.

ત્યાંના એક પ્રોફેસરના જણાવ્યા મુજબ, ચીનમાં સરનેમની સંખ્યામાં ઘટાડો થવાના મુખ્ય 3 કારણ જવાબદાર છે. જેમાં પ્રથમ કારણ છે સાંસ્કૃતિક વિવિધતાનો અભાવ, બીજું છે ભાષાની સમસ્યા અને ત્રીજુ છે ડિજિટલ યુગમાં ટેક્નિકની સમસ્યા. સાથે-સાથે ચીનની ભાષા અંગ્રેજી જેવી સરળ પણ નથી કે ત્યાં વધુ અક્ષર જોડી અથવા ઘટાડીને સરનેમ બની જાય.

ચીનમાં ઘણાં લોકો જૂની સરનેમ છોડીને નવી સરનેમ અપવાની રહ્યા છે કે જેથી તેઓ આજની ડિજિટલ દુનિયામાં ક્યાંક પાછળ રહી જાય નહીં. હવે અહીંના લોકો એ વાતથી પણ દુ:ખી છે કે આગામી પેઢી ક્યાંક પોતાનો ઈતિહાસ, ઓળખ અને પરંપરાને ભૂલી જાય નહીં.