જીવતા-જાગતા સૈનિકોને 'રોબર્ટ' જેવા બનાવશે ફ્રાન્સ, બદલાઈ જશે યુદ્ધની રણનીતિઓ

પેરિસ: ભવિષ્યમાં રોબર્ટ યુદ્ધ લડતા હશે તેવી વાતો તો આપણે ઘણા સમયથી સાંભળતા આવી રહ્યા છીએ. પણ હવે તો કેટલાક દેશો જીવતા-જાગતા સૈનિકોને રોબર્ટ જેવા બનાવવાની દિશામાં રિસર્ચ કરી રહ્યા છે. હવે, તેમાં ફ્રાન્સ પણ જોડાયું છે. ફ્રાન્સના આર્મ્ડ ફોર્સ મંત્રાલયની એથિકલ કમિટીએ બાયોનિક સૈનિકો તૈયાર કરવાની યોજનાને મંજૂરી આપી દીધી છે. આ સૈનિકોને દુખાવા અને સ્ટ્રેસનો કોઈ અનુભવ જ નહીં થાય અને તેમના મગજને માઈક્રોચિપની મદદથી પાવરફુલ બનાવી દેવાશે. જે દેશો આવા પ્રોજેક્ટ પર કામ કરી રહ્યા છે તેમને ફ્રાન્સ માટે આવા સૈનિકો તૈયાર કરવા ઓર્ડર આપવાની મંજૂરી આપી દેવામાં આવી છે.

એવી ગોળી (પિલ્સ) પણ તૈયાર કરવામાં આવી રહી છે, જે ગળ્યા પછી સૈનિકો લાંબો સમય જાગી શકશે અને સાંભળવાની શક્તિ વધારવાની સર્જરી પર રિસર્ચ ચાલી રહ્યું છે.

ધ ટાઈમ્સના રિપોર્ટ મુજબ, મગજમાં જે માઈક્રોચિપ લગાવાશે તે એવી ડિઝાઈન કરાશે કે તે મગજને શાંત કરનારા તત્વો રિલીઝ કરે અને 'મગજની ક્ષમતાને વધારે.' વૈજ્ઞાનિકો એવું ઈમ્પ્લાન્ટ પણ તૈયાર કરી રહ્યા છે જેના દ્વારા આર્મી હેડક્વાર્ટરથી જ આ સૈનિકોનું લોકેશન ટ્રેક કરી શકાય. તેઓ એવી ડ્રગ્સ તૈયાર કરવા પર રિસર્ચ કરી રહ્યા છે જે આપવાથી સૈનિકોને દુખાવાનો અનુભવ ન થાય તેમજ આઈસોલેશનની સ્થિતિને સહન કરી શકે.

રિપોર્ટમાં ચેતવણી અપાઈ છે કે, ફ્રાન્સ એ દેશો કરતા પાછળ રહી જશે જે આ પ્રકારના ફિલ્ડ્સમાં પહેલેથી રિસર્ચ શરૂ કરી ચૂક્યા છે. જોકે, રિપોર્ટમાં એ વાત માનવામાં આવી છે કે, સૈનિકોની 'માનવતા'ને છીનવી લેનારી કોઈપણ હરકતને રોકવી જોઈએ.

આર્મ્ડ ફોર્સિઝના મંત્રી ફ્લોરેન્જ પાર્લેએ કહ્યું કે, ફ્રાન્સ તેના સૈનિકોમાં ઉતાવળે માઈક્રોચિપ ઈમ્પ્લાન્ટ નહીં કરે. જોકે, તેમણે કહ્યું કે, 'આપણે સ્પષ્ટ થવું પડશે. તે આપણું ભવિષ્ય છે અને તેના માટે આપણે તૈયાર થવું પડશે.'

અમેરિકાના નેશનલ ઈન્ટેલિજન્સના ડિરેક્ટર જોન રેટક્લિફે જણાવ્યું કે, ચીને આર્ટિફિશિયલ શક્તિવાળા સૈનિકો બનાવવાના પ્રયાસ પહેલેથી જ શરૂ કરી દીધા છે અને તેણે ટેસ્ટિંગ પણ શરૂ કરી દીધું છે. તેમણે જણાવ્યું કે, ચીનની શક્તિશાળી બનવાની ઈચ્છાને કોઈ નૈતિક સરહદો નડતી નથી.

ફ્રાન્સના કિસ્સામાં બોયોનિક સૈનિકો તૈયાર કરવાની વાત એટલા માટે પણ મહત્વની છે કે, છેલ્લા કેટલાક સમયથી ફ્રાન્સમાં આંતકવાદી હુમલા વધ્યા છે. તેવામાં આતંકવાદીઓ સામે લડવા માટે પણ આવા સૈનિકો ઘણા ઉપયોગી થઈ શકે તેવું કદાચ ફ્રાન્સનું માનવું હોઈ શકે છે. જો આવા સૈનિકો તૈયાર થશે તો ભવિષ્યમાં થનારા યુદ્ધ માટે દરેક દેશોએ કોઈ નવી જ રણનીતિ તૈયાર કરવી પડશે.