ચીનની હોટલમાં પોલર બીયર પર અત્યાચાર, 24 કલાક ચાલે છે તેમનો 'શો'

આ હોટલનો એક વિડીયો સોશિયલ મીડિયામાં આવ્યો છે જેમાં જોઈ શકાય છે કે હોટલના મહેમાનો પોલર બીયર માટે નુકસાનકારક એવી ગરમ લાઈટમાં તેમના ફોટોગ્રાફ લઈ રહ્યા છે. પોલર બીયર્સને જ્યાં રાખવામાં આવ્યા છે તે પાંજરામાં બરફના નકલી પર્વતો બનાવવામાં આવ્યા છે અને સફેદ કલરના રંગથી તળીયાને રંગવામાં આવ્યું છે.

પ્રાણીઓના હક્કો માટે કામ કરતી સંસ્થાઓએ હોટલની આકરી ટીકાઓ કરી છે અને લોકોને પ્રાણીઓ પર અત્યાચાર કરીને રૂપિયા કમાતી હોટલમાં ન જવાની અપીલ કરી છે. પેટા એશિયાના ઉપપ્રમુખ જેસન બેકરે જણાવ્યું છે કે પોલર બીયર્સનું ઘર આર્કટિક છે તેને પ્રાણી સંગ્રહાલય કે એક્વેરિયમ્સમાં ગ્લાસના બોક્સમાં રાખી શકાય નહીં. હોટલમાં તો ક્યારેય નહીં. પોલર બીયર્સ સામાન્ય રીતે હજારો માઈલ્સમાં ફેલાયેલી પોતાની ટેરેટરીમાં ફરતા હોય છે.

હર્બિન પોતાના આઈસ ફેસ્ટિવલ માટે જાણીતું છે અને આ હોટલ મોટા ઈગ્લુ આકારની બનાવવામાં આવી છે. જેની ટોચ પર કૃત્રિમ બરફ રાખવામાં આવ્યો છે. જોકે, ચાઈનિઝ સોશિયલ મીડિયા યુઝર્સે આ હોટલ સામે રોષ વ્યક્ત કર્યો છે. એક યુઝરે લખ્યું હતું કે, પોલર બીયર્સ માટે જેલ. શું આપણે પ્રાણીઓ પ્રત્યેના અત્યાચારમાંથી કંઈ શીખ્યા છીએ?