અમેરિકામાં કરોડો મચ્છર છોડવા માટે ઘડાઈ રહી છે યોજના, કંઈક આવું છે કારણ

ફ્લોરિડા: અમેરિકામાં ડેંગ્યુ અને ઝિકા વાયરસ જેવી બીમારીઓને ખતમ કરવા માટે એક ખાસ યોજના ઘડવામાં આવી છે. આ યોજના હેઠળ અમેરિકાના ફ્લોરિડામાં 75 કરોડ જેનેટિકલી (આનુવંશિક રીતે) મોડીફાઈડ મચ્છર છોડવામાં આવશે. લેબમાં તૈયાર કરાયેલા આ મચ્છરને છોડવાનો મુખ્ય હેતુ બીમારીઓ ફેલાવનાર મચ્છરોની સંખ્યાને ઓછી કરવાનો છે. જેનું નામ OX5034 રાખવામાં આવ્યું છે. વર્ષ 2021માં ફ્લોરિડાના એક ટાપુ ઉપર આ મચ્છરોને છોડવામાં આવશે.

ફ્લોરિડામાં આ યોજનાને આગામી વર્ષ પહેલા પાયલોટ પ્રોજેક્ટ તરીકે શરૂ કરવામાં આવશે. આ કંપનીના જણાવ્યા મુજબ તેઓ ગત કેટલાંક વર્ષો દરમિયાન 10 લાખ જેનેટિકલી (આનુવંશિક રીતે) મોડીફાઈડ મચ્છર છોડી ચૂક્યા છે. અને અત્યાર સુધી મનુષ્ય અને પર્યાવરણને કોઈ પ્રકારનો ખતરો ઊભો હોય તેવું સામે આવ્યું નથી.

અહીં ઉલ્લેખનીય છે કે જેનેટિકલી (આનુવંશિક રીતે) મોડીફાઈડ મચ્છર એક નર મચ્છર હોય છે. જે લેબની અંદર ખાસ પ્રકારે તૈયાર કરવામાં આવે છે. આ મચ્છરોને તે જગ્યાઓ પર છોડવામાં આવશે કે જ્યાં ડેંગ્યુ અને ઝિકા વાયરસ જેવી બીમારીઓ ફેલાવનાર માદા મચ્છરોની સંખ્યા વધારે છે. કારણકે માદા મચ્છર ડેંગ્યુ અને ઝિકા વાયરસ જેવી બીમારીઓ ફેલાવે છે. આ નર મચ્છર તે માદા મચ્છરની સાથે બ્રીડિંગ (સંવર્ધન) કરશે.

બ્રીડિંગ દરમિયાન નર મચ્છરમાં રહેલું પ્રોટીન માદા મચ્છરમાં પહોંચી જશે. આ કારણે નવા પેદા થઈ રહેલા માદા મચ્છર સમય પહેલા મરી જશે. ધીરે-ધીરે માદા મચ્છરોની સંખ્યા ઘટી જશે. જ્યારે મચ્છરોની સંખ્યા ઘટશે ત્યારે મનુષ્યમાં તેના દ્વારા વાયરસ ફેલાવાનું પ્રમાણ પણ ઓછું થઈ જશે. આ નર મચ્છરોમાં એક પ્રોટીન હોય છે જે માદા મચ્છરને ડંખ મારવાની ઉંમર સુધી પહોંચતા પહેલા જ મારી નાખશે.

એવું કહેવાય છે કે નર મચ્છરો મનુષ્યને ડંખ મારતા નથી. આ મચ્છર ભોજન માટે ફૂલોના રસ પર નિર્ભર રહે છે. મંગળવારના રોજ ફ્લોરિડામાં અધિકારીઓએ બે વર્ષના સમયગાળા માટે 75 કરોડ સંશોધત મચ્છરોને છોડવાની અનુમતિ આપી છે.