દુનિયાભરમાં કોરોના કેસનો આંકડો વધી રહ્યો છે, મૃત્યુઆંક 10 લાખની નજીક પહોંચ્યો

વોશિંગટનઃ દુનિયાભરમાં કોરોના વાયરસના કેસ ઝડપથી વધી રહ્યા છે. આવામાં કેટલાક દેશોમાં કોરોના વાયરસનો બીજો રાઉન્ડ પણ શરુ થઈ રહ્યો હોવાનું માનવામાં આવી રહ્યું છે. કેસ પર કંટ્રોલ મેળવ્યા બાદ ફરી ઉછાળો નોંધાતા દુનિયાભરમાં ચિંતા વધી રહી છે. આવામાં આખી દુનિયામાં કોરોના વાયરસના કુલ કેસનો આંકડો અમેરિકાના જોન હોપકિન્સ યુનિવર્સિટીના આંકડા પ્રમાણે 3,29,77,556 પર પહોંચ્યો છે.

જ્યારે કોરોના વાયરસના કારણે દુનિયાભરમાં મૃત્યુ પામનારા લોકોની સંખ્યા 10 લાખની નજીક પહોંચી ગઈ છે. અત્યાર સુધીમાં 9,96,309 લોકોના મોત થઈ ગયા છે. જેમાં અમેરિકા સૌથી ઉપર છે આ પછી બ્રાઝીલ અને ત્રીજા નંબર પર ભારતનો નંબર આવે છે. દુનિયામાં સાજા થયેલા દર્દીઓનો આંકડો 2,27,71,206 છે.

દુનિયામાં અમેરિકા 71,13,666 કોરોના વાયરસના કેસ અને 2,04,750 મોત સાથે સૌથી પહેલા નંબર પર છે. જ્યારે અહીં પાછલા એક દિવસમાં વધુ 45,000 કરતા વધુ નવા કેસ નોંધાયા છે.

જ્યારે ભારત દુનિયામાં સૌથી અસરગ્રસ્ત દેશોમાં બીજા નંબર છે, ભારતમાં કોરોના વાયરસના કુલ કેસનો આંકડો 59,92,533 પર પહોંચ્યો છે જેમાંથી 9,56,402 એક્ટિવ કેસ છે અને 49,41,628 લોકો કોરોનાને હરાવીને સાજા થઈ ગયા છે અને હોસ્પિટલમાંથી રજા આપી દેવામાં આવી છે.

ભારત કોરોના વાયરસના કેસમાં બીજા નંબર છે પરંતુ મૃત્યુઆંકમાં બાકી દેશો કરતા સ્થિતિ ઘણી સારી છે. અમેરિકા બાદ બ્રાઝિલ અને પછી ભારત કોરોનાથી થયેલા મૃત્યુના કેસમાં ત્રીજા નંબર છે.

રવિવારે સામે આવેલા રિપોર્ટ પ્રમાણે નજર કરીએ તો ભારતમાં પાછલા 9 દિવસથી સતત કેસમાં ઘટાડો નોંધાઈ રહ્યો હતો, જેના કારણે એમ માનવામાં આવી રહ્યું હતું કે ભારતમાં કોરોના હારી રહ્યો છે. બીજી તરફ ટેસ્ટની સંખ્યા વધતી હોવા છતાં કેસમાં ઘટાડો નોંધાઈ રહ્યો હતો. જોકે, કેટલાક દેશોમાં પીક લેવલ પર પહોંચ્યા બાદ ફરી એકવાર કેસમાં વધારો થઈ રહ્યો છે જેમાં રશિયા, સ્પેન, ફ્રાન્સ અને યુકેનો સમાવેશ થાય છે પરંતુ આનો મતબલ એવો પણ નથી કે સરેરાશ કેસમાં સમય જતા વધારો થાય જ છે. બ્રાઝિલ, કોલમ્બિયા, મેક્સીકો અને સાઉથ આફ્રીકામાં લાબા સમય પછી પણ નવા કેસમાં ઉછાળો નથી દેખાયો અને આવા 10 દેશો છે. બ્રાઝિલ અને સાઉથ આફ્રીકા જુલાઈના અંતમાં તેમના પીક લેવલ પર પહોંચ્યા હતા પરંતુ તે પછી ફરી તે લેવલ જોવા મળ્યું નથી. કોલમ્બિયા અને મેક્સીકો ઓગસ્ટમાં તેમના પીક લેવલપર પહોંચ્યા હતા પરંતુ ત્યાં ફરી ઉછાળો જોવા મળ્યો નથી.