અમેરિકાએ H-1B અને L-1 વિઝા એપ્લિકેશન ફીમાં 75 ટકા સુધીનો વધારો કર્યો

કોરોના વાયરસની અસરના પગલે દુનિયાભરના દેશોની આર્થિક સ્થિતિ ખરાબ થઈ ગઈ છે. અમેરિકા જેવો વિકસિત દેશ પણ તેમાંથી બાકાત નથી. એવામાં આર્થિક સંકટનો સામનો કરી રહેલા USના ઈમિગ્રેશન વિભાગે H-1B અને L-1 સહિતના વિઝા એપ્લિકેશન ફીમાં મોટો વધારો કર્યો છે. H-1B વિઝા એપ્લિકેશન માટેની બેસિક એપ્લિકેશન ફી 21 ટકાના વધારા સાથે $555 કરી દેવામાં આવી છે, જે આ પહેલા $460 હતી. આવી જ રીતે L-1 વિઝા (કંપનીમાં ઈન્ટરનલ ટ્રાન્સફર) ફીમાં પણ 75 ટકાનો વધારો કરીને $805 કરી દેવામાં આવી છે.

ઓક્ટોબરથી આ નવી વધારેલી ફીનો ચાર્જ વસૂલવામાં આવશે. વિઝા એપ્લિકેશન ફી નોકરી રાખનાર દ્વારા સ્પોન્સર કરવામાં આવતી હોય છે. એવામાં આ વધારાથી વિદેશમાં કર્મચારીઓને નોકરીએ રાખવાનું કંપનીઓ માટે વધારે મોંઘું બનશે.

લેટેસ્ટ આંકડા મુજબ, 30 સપ્ટેમ્બર 2019એ પૂરા થયેલા નાણાંકીય વર્ષમાં 3.88 લાખ H-1B વિઝા આપવામાં આવ્યા હતા, જેમાંથી અંદાજે 2.78 લાખ (ટોટલના 72 ટકા) ભારતીયોને અપાયા હતા. આ આંકડામાં વિઝા એક્સટેન્શન્સ પણ સામેલ છે. ભારતીયો સૌથી મોટા H-1B વીઝા ધારકો છે, અમેરિકાની હેડક્વોર્ટર કંપનીઓએ મોટી સંખ્યામાં H-1B વિઝા પર કર્મચારીઓને રાખ્યા છે. હાલ દેશમાં L-1 વિઝાનો ડેટા ઉપલબ્ધ નથી.

હાલમાં યુએસ સિટિઝનશીપ એન્ડ ઈમિગ્રેશન સર્વિસ (USCIS), યુએસ ગવર્નમેન્ટની ઈમિગ્રેશન એજન્સીએ સરકાર પાસેથી ઈમરજન્સી ફન્ડીંગ માટે 1.2 બિલિયન ડોલરની માગણી કરી છે. તેણે ઓગસ્ટના અંત સુધીમાં 13,000 કર્મચારીઓને છૂટા કરવાનો નિર્ણય ટાળી દીધો છે. સામાન્ય રીતે એજન્સીને ફી દ્વારા જ વધારે ફંડ મળતું હતું.

હાલમાં 50થી વધારે કર્મચારીઓ ધરાવતી કંપનીઓ જેમાં 50 ટકાથી વધુ કર્મચારીઓ H-1B અથવા L-1 વિઝા પર હોય તેમણે દરેક નવા H-1B વિઝા માટે 4000 ડોલર અને L-1 વિઝા માટે 4500 ડોલર વધારે ચૂકવવા પડી શકે છે. વિઝાને રિન્યૂ કરાવવા માટે પણ ફી ચૂકવવાની રહેશે અને તેમાંથી વાર્ષિક 200 મિલિયન ડોલર એકઠા થવાનો અંદાજ છે.

આવી જ રીતે H-1B વિઝા પરના કર્મચારીઓ સાથે જતા પાર્ટનર (સ્પાઉસ)ને પણ હવે વર્ક પરમિટ માટે 550 ડોલર આપવા પડશે, જે 34 ટકાનો વધારો છે. જ્યારે સીટિઝનશીપ માટે એપ્લાય કરનારાઓને 640 ડોલરની જગ્યાએ 83 ટકાના વધારા સાથે 1170 ડોલર આપવા પડશે. બાયોમેટ્રિક્સ સહિતની અન્ય સર્વિસની ફીમાં પણ વધારો કરવામાં આવ્યો છે.

આ પણ જુઓઃ કોરોનાના કારણે રાજકોટમાં મીઠાઈના બિઝનેસને ભારે ફટકો