મુસ્લિમ દેશ યુએઈમાં ભવ્ય મંદિર ભક્તો માટે ખુલ્લું મૂકાયું, પુરું થયું ભારતીયોનું સપનું

યુએઈના સહિષ્ણુતા અને સહ અસ્તિત્વ મંત્રી શેખ નાહયાન બિન મુબારક અલ નાહયાને મંદિરમાં દીપ પ્રગટાવી આ મંદિરને ખૂલ્યું મૂક્યું. મુખ્ય પ્રાર્થના કક્ષમાં રિબિન કાપવાથી આ કાર્યક્રમની શરૂઆત થઈ હતી. આ પ્રસંગે શેખ નાહયાનની સાતે યુએઈમાં ભારતીય રાજદૂત સંજય સુધીરએ પણ ખાસ ભાગ લીધો. દુબઈમાં આવેલા હિંદુ મંદિરના ટ્રસ્ટી રાજુ શ્રોફ સાથે લગભગ 200 લોકોએ આ કાર્યક્રમમાં ભાગ લીધો હતો.

ભારતીય રાજદૂત સંજય સુધીરે આ પ્રસંગે કહ્યું કે, 'આજે દુબઈમાં એક નવા હિંદુ મંદિરનું ઉદ્ઘાટન થઈ રહ્યું છે, જે ભારતીય સમુદાય માટે સ્વાગત કરનારા સમાચાર છે. આ મંદિરનું ઉદ્ઘાટન યુએઈમાં રહેતા હિંદુ સમાજની ધાર્મિક આકાંક્ષાઓને પૂરી કરે છે. નવા મંદિરની સાથે જ એક ગુરુદ્વારા પણ જોડાયેલું છે, જેને 2012માં ખુલ્લી મુકાઈ હતી.'

દુબઈના હિંદુ મંદિરના ટ્રસ્ટી રાજૂ શ્રોફે આ પ્રસંગે કહ્યું કે, 'મંદિરનું ઉદ્ઘાટન માત્ર હિંદુઓ માટે નહીં, પરંતુ સંયુક્ત આરબ અમીરાતમાં રહેતા ભારતીયો માટે એક સપનું સાચું થવા જેવું છે.' તેમણે કહ્યું કે, 'કોરોના છતાં દુબઈ સરકારના સમર્થનના કારણે નિર્માણ કામમાં મુશ્કેલી ન પડી. આ મંદિર દુબઈ અને યુએઈની સરકાર દયાળુ હોવાનું પ્રતીક છે.'

મંદિરમાં એન્ટ્રી કરવા માટે પહેલેથી રજિસ્ટ્રેશન કરાવવાનું રહેશે. ભક્તો મંદિર પહોંચ્યા પહેલા ઓનલાઈન જ આ કામ કરી શકે છે. સપ્ટેમ્બરમાં લગભગ બે લાખ લોકોએ રજિસ્ટ્રેશન કરી એન્ટ્રી કરી હતી. આ મંદિર સવારે 6થી રાત્રે 8 વાગ્યા સુધી ખુલ્લું રહેશે.

મંદિરના અધિકારીઓ તરફથી જણાવાયું કે, આ વર્ષના અંત સુધીમાં અહીં એક વિશાળ કોમ્યુનિટી હૉલ બનાવાશે. જ્યાં હિંદુ સમારંભ જેવા કે, લગ્ન, નામકરણ અને યજ્ઞ થઈ શકશે. મંદિરની પાસે એક મોટું રસોડું છે, જ્યાં ખાવા-પીવાનો વિકલ્પ સામેલ છે.