ચીનનો સામનો કરવા માટે ભારત સાથે સહયોગ વધારશે આ દેશ

કેનબરાઃ હિંદ પ્રશાંત ક્ષેત્રમાં ચીનથી વધી રહેલા જોખમનો સામનો કરવા માટે ઓસ્ટ્રેલિયાએ ભારત સાથે સહયોગ વધારવાની જાહેરાત કરી છે. ઓસ્ટ્રેલિયાના ડિફેન્સ મિનિસ્ટર લિન્ડા રેનોલ્ડ્સે કહ્યું છે કે વધારે સુરક્ષિત, ખુલ્લા, સમાવેશી અને સમૃદ્ધ હિંદ-પ્રશાંત વિસ્તારના દ્રષ્ટીકોણના સમર્થનમાં ઓસ્ટ્રેલિયા સમાન વિચારધારા ધરાવતા ભારત જેવા દેશો સાથે પોતાના સંબંધો મજબૂત કરવાનું જારી રાખશે. ચીન સંસાધનોથી સંપન્ન આ વિસ્તારમાં પોતાની દખલ વધારી રહ્યું છે.

ભારત સાથે ઓસ્ટ્રેલિયાના સંબંધો મજબૂત
રેનોલ્ડ્સે કહ્યું છે કે તાજેતરમાં હિંદ મહાસાગરમાં કરવામાં આવેલો નેવીનો સંયુક્ત અભ્યાસ વ્યાપક રણનીતિક ભાગીદારીના રૂપમાં બંને દેશોના મજબૂત સંબંધો દર્શાવે છે. ગત સપ્તાહ ભારતીય નેવી અને રોયલ ઓસ્ટ્રેલિયન નેવીએ હિંદ મહાસાગરના ઉત્તર-પૂર્વ ક્ષેત્રમાં બે દિવસીય સંયુક્ત અભ્યાસ કર્યો હતો. ભારત અને ઓસ્ટ્રેલિયા દ્વારા આ પ્રથમ મોટો સૈન્ય અભ્યાસ હતો.

સમાન વિચારધારવાળા દેશો વધારશે સંબંધ
રેનોલ્ડ્સે એક નિવેદનમાં કહ્યું હતું કે અમે વધારે સુરક્ષિત, ખુલ્લા, સમાવેશી અને સમૃદ્ધ હિંદ પ્રશાંત વિસ્તારના એકસમાન દ્રષ્ટીકોણના સમર્થનમાં સમાન વિચારધારાવાળા દેશો જેમ કે ભારત સાથે પોતાનો સંબંધ મજબૂત બનાવવાનું જારી રાખશે. આ વર્ષની શરૂઆતમાં વડાપ્રધાનના ડિજિટલ શિખર સંમેલન બાદ ભારત સાથે આપણા રક્ષા સંબંધ ઐતિહાસિક ઉચ્ચ સ્તર પર છે અને ભવિષ્યમાં અમારી વ્યાપક ભાગીદારી વધારે બનશે તેવી આશા વ્યક્ત કરું છું.

ઓસ્ટ્રેલિયા અને ચીન વચ્ચે તણાવ
કોરોના વાયરસને લઈને ઓસ્ટ્રેલિયાના સવાલોથી નારાજ ચીને આર્થિક રીતે ગાળીયો કસવાનું શરૂ કર્યું છે. તાજેતરમાં જ ચીનની સરકારે પોતાના નાગરિકોને ઓસ્ટ્રેલિયા ન જવાની સલાહ આપી છે. એટલું જ નહીં ચીને ઓસ્ટ્રેલિયાથી આયાત થનારા ઘણા સમાન પર પ્રતિબંધ લગાવ્યો છે.