યુરોપના 19 દેશોમાં મોંઘવારીએ માઝા મુકી, ખાદ્ય ચીજવસ્તુ, ગેસ-વીજળીના અસહ્ય ભાવોથી લોકોમાં રોષ ફૂટ્યો

મોંઘવારી ફક્ત ભારતને જ નહીં પણ સમગ્ર દુનિયાને પોતાના ભરડામાં લઈ રહી છે. યુરોપના 19 દેશોમાં પણ મોંઘવારીનો દર 10.7 ટકા સુધી પહોંચી ગયો છે. રશિયા-યુક્રેન યુદ્ધ બાદ પુરવઠાની સ્થિતિ તંગ બની છે અને તેને લીધે યુરોપના દેશોમાં ગેસ તથા એનર્જી સંકટ જોવા મળી રહ્યું છે.

25 વર્ષમાં સૌથી વધારે મોંઘવારી
સપ્ટેમ્બર મહિનામાં યુરોપમાં મોંઘવારીનો દર 10 ટકા નજીક રહ્યો હતો, જે ઓક્ટોબર મહિનામાં વધીને 10.7 ટકા સુધી પહોંચી ગયો છે. યુરોપના દેશોમાં ઠંડીની સિઝન શરૂ થઈ ગઈ છે. આ સંજોગોમાં આ દેશોમાં એનર્જીનો વપરાશ વધી રહ્યો છે. યુરોઝોન માટે વર્ષ 1997માં આંકડા જાહેર કરવામાં આવ્યા ત્યારબાદ સૌથી ઉચ્ચ લેવલ પર છે. ફ્રાંસ, જર્મની અને ઈટાલી જેવા મોટા અર્થતંત્ર ધરાવતા દેશોમાં અર્થતંત્રની સ્થિતિ ડામાડોળ છે. બીજી બાજુ ફ્રાંસમાં સતત ત્રીજા ત્રિમાસિક ગાળા દરમિયાન ઘટાડાનો માહોલ છે. ચેક રિપબ્લિકમાં સરકાર વિરોધી પ્રદર્શન તેજ થઈ ગયું છે. રાજધાની પ્રાગમાં હજારો લોકોએ મંદ પડી રહેલા અર્થતંત્ર અને વધતી મોંઘવારીના વિરોધમાં પ્રદર્શન કર્યું હતું.

ખાદ્યસામગ્રીની કિંમતમાં 13 ટકાનો ઉછાળો
યુરોસ્ટેટે કહ્યું કે રશિયા-યુક્રેન યુદ્ધને પગલે કુદરતી ગેસની કિંમતોમાં જોરદાર ઉછાળો આવ્યો છે અને વીજળીની કિંમત વધતા મોંઘવારીમાં વધારો થયો છે. ઉર્જા સંશાધનો પર ખર્ચ વધવાથી ગ્રાહકોનો અન્ય આવશ્યક ચીજવસ્તુઓ પાછળનો ખર્ચ ઘટી ગયો છે. અત્રે ઉલ્લેખનીય છે કે આ દેશોમાં ખાદ્યચીજવસ્તુઓ, શરાબ તથા તંમાકુ ઉત્પાદનોની કિંમતમાં 13.1 ટકાનો વધારો થયો છે.


આગામી વર્ષે ફુગાવો વર્તમાન સ્તર કરતા વધુ તંગ બની શકે છે
યુરોપીયન નેતાઓએ યુક્રેનનું સમર્થન કર્યું છે, તેને હથિયારો મોકલ્યા છે અને સસ્તા રશિયન ઓઈલ-ગેસને લઈ પોતાના અર્થતંત્રની નિર્ભરતાને ઓછી કરવા અંગે નિવેદન આપ્યા છે. જોકે આ બાબત એટલી સરળતાથી થઈ શકે તેમ નથી અને પરિણામ સ્વરૂપે તેમની નીતિઓનું લોકો તરફથી સમર્થન મળી રહ્યું નથી. વર્તમાન સંકટથી બહાર નિકળવા માટે કોઈ નક્કર સમાધાન નથી. અલબત બ્રિટન તેનું આ ઉદાહરણ છે. કેટલાક નિષ્ણાતોનું માનવું છે કે આગામી વર્ષે ફુગાવો આના કરતા પણ વધારે તંગ બનશે.