સાઉદી અરેબિયાના પ્રિન્સને ગુપ્ત રીતે મળવા પહોંચ્યા ઈઝરાયલના વડાપ્રધાન

દુબઈ: સંયુક્ત આરબ અમીરાત અને બહરીન પછી ખાડી દેશોમાં સૌથી શક્તિશાળી દેશ સાઉદી અરેબિયાની સાથે ઈઝરાયલના સંબંધ સામાન્ય થવા તરફથી આગળ વધતા જોવા મળી રહ્યા છે. એક મોટા ઘટનાક્રમમાં ઈઝરાયલના વડાપ્રધાન નેતન્યાહૂ રવિવારે સાઉદી અરેબિયાના પ્રિન્સ મોહમ્મદ બિન સુલતાન અન અમેરિકાના વિદેશ મંત્રી માઈક પોમ્પિયોને મળવા નિઓમ શહેર પહોંચ્યા. આ દરમિયાન ઈઝરાયલની ગુપ્તચર એજન્સી મોસાદના ચીફ યોસ્સી કોહેન પણ ઉપસ્થિત હતા.

ચાર લોકોની વચ્ચે આ અત્યંત ગુપ્ત મિટિંગ સાઉધી અરેબિયાના નિઓમ શહેરમાં થઈ. ઈઝરાયલના વડાપ્રધાનના કાર્યાલયે આ બેઠક વિશે કોઈ ટિપ્પણી નથી કરી, પરંતુ તેમના વિમાનને સાઉદી અરેબિયા જતા ટ્રેક કરાયું છે. સાઉદી અરેબિયા અને ઈઝરાયલ વચ્ચે સંબંધો સામાન્ય કરવા પર અમેરિકા સતત ભાર આપી રહ્યું છે અને આ બધાને લઈને પહેલી વખત આટલા ઉચ્ચ સ્તરે બેઠક થઈ છે.

ઈઝરાયલના ન્યૂઝ પેપર હારિત્ઝ મુજબ, આ એ જ પ્લેન છે, જેના દ્વારા ઈઝરાયલના વડાપ્રધાન બેન્જામિન નેતન્યાહૂ ઘણી વખત રશિયાના પ્રેસિડન્ટ વ્લાદિમીર પુતિન સાથે મુલાકાત કરી ચૂક્યા છે. અમેરિકાના વિદેશ મંત્રી ઘણા સમયથી એ પ્રયાસમાં છે કે, ખાડી દેશ ઈઝરાયલ સાથે સંબંધોને સામાન્ય બનાવે,, જેથી ઈરાનના ખતરાનો સામનો કરી શકાય. સાઉદી અરેબિયાએ હજુ સુધી ઈઝરાયલ સાથે સંબંધ સામાન્ય બનાવવાની વાતનું ખંડન કર્યું છે. સાઉદીએ કહ્યું છે કે, પેલેસ્ટાઈનના મુદ્દાનું પહેલા સમાધાન થયું જોઈએ.

ઉલ્લેખનીય છે કે, પેલેસ્ટાઈનના મામલે મુસ્લિમ દેશો સાથે ઈઝરાયલના સંબંધો તંગ રહ્યા છે. ઈરાન સાથે તો તેના સંબંધો કાયમ બગડેલા રહ્યા છે. ઈરાન સાથે અમેરિકાના સંબંધો વણસ્યા છે. અમેરિકાએ તો ઈરાન પર ઘણા પ્રતિબંધો લગાવ્યા છે. ત્યારે બીજી તરફ ઈઝરાયલે હવે મુસ્લિમ દેશો સાથે પોતાના સંબંધો સુધારવાના પ્રયાસ શરૂ કર્યા છે. તેના જ ભાગરૂપે ઈઝરાયલના વડાપ્રધાન પહેલા સંયુક્ત આરબ અમીરાત અને પછી બહેરીન સાથે સંબંધો સુધારવા આગળ વધ્યા હતા અને હવે જો સાઉદી અરેબિયા સાથે પણ તેના સંબંધો સુધરે છે તો ઈરાન સામે અમેરિકાને એક ધરી રચવાની તક મળશે. અમેરિકા, ઈઝરાયલ અને ઈરાન સિવાયના મુસ્લિમ દેશો એક થઈ જશે તો ઈરાન સામે એક મોટો મોરચો ઊભો થશે. સામે પક્ષે ઈરાન પાસે પણ ક્રૂડ ઓઈલનો મોટો ભંડાર છે એટલે તેના પક્ષમાં રહેલા રશિયા જેવા દેશોનું એ સમયે કેવું વલણ રહેશે તે પણ ઘણુ મહત્વનું છે. આમ, ઈઝરાયલની આ મુસ્લિમ દેશો સાથે સંંબંધો સુધારવાની શરૂઆત અને તેમાં અમેરિકાનો સાથે આપવો આવનારા સમયમાં દુનિયાના રાજકારણમાં મોટી ઉથલપાથલ સર્જશે તેવી શક્યતા વ્યક્ત કરાઈ રહી છે.