અમેરિકાના 46મા પ્રમુખ બન્યા બાઈડન, ઉપપ્રમુખ બનીને કમલા હેરિસે રચ્યો ઈતિહાસ

જો બાઈડને બુધવારે અમેરિકાના 46મા પ્રમુખ તરીકેના શપથ લીધા. જ્યારે કમલા હેરિસે ઉપપ્રમુખ તરીકેના શપથ લીધા. આ સાથે જ કમલા અમેરિકાના ઈતિહાસમાં ઉપપ્રમુખ બનનારા પ્રથમ મહિલા બની ગયા છે. શપથ વિધી અગાઉ બાઈડને ટ્વિટ કરીને જણાવ્યું હતું કે, અમેરિકામાં આ એક નવો દિવસ છે. જોકે, તેમની શપથ વિધીમાં તેમના પુરોગામી ડોનાલ્ડ ટ્રમ્પ હાજર રહ્યા ન હતા. શપથ વિધીના થોડા કલાકો પહેલા જ તેમણે તેમના પત્ની અને ફર્સ્ટ લેડી મેલેનિયા ટ્રમ્પ સાથે વ્હાઈટ હાઉસ છોડી દીધું હતું.

બાઈડનની શપથ વિધીમાં ભૂતપૂર્વ પ્રમુખ બરાક ઓબામા અને તેમના પત્ની મિશેલ ઓબામા હાજર રહ્યા હતા. તેમણે બાઈડનને અભિનંદન પાઠવ્યા હતા અને ટ્વિટ કરી હતી કે, અભિનંદન મારા મિત્ર, પ્રમુખ જો બાઈડન. આ તમારો સમય છે.

કમલા હેરિસ અમેરિકાના પ્રથમ મહિલા, બ્લેક અને એશિયન-અમેરિકન ઉપપ્રમુખ બન્યા છે. આ તેમણે ઈતિહાસ રચ્યો છે. ઉપપ્રમુખ તરીકેના શપથ લેતા પહેલા તેમણે માતા અંગે એક વિડીયો ટ્વિટ કર્યો હતો.

બાઈડન અને કમલા હેરિસે પ્રમુખ અને ઉપપ્રમુખ તરીકેના શપથ લીધા બાદ વડાપ્રધાન નરેન્દ્ર મોદીએ ટ્વિટ કરીને બંનેને અભિનંદન પાઠવ્યા હતા.

આ અમેરિકાનો, લોકશાહીનો દિવસ છેઃ બાઈડન
શપથ લીધા બાદ બાઈડને આ દિવસને અમેરિકાનો અને લોકશાહીનો દિવસ ગણાવ્યો હતો. તેમણે કહ્યું હતું કે, આ અમેરિકાનો દિવસ છે. આ લોકશાહીનો દિવસ છે. ઈતિહાસ અને આશાનો દિવસ છે. તેમણે અમેરિકન નાગરિકોને ભાગલાવાદી માનસિકતામાંથી બહાર આવવાની અપીલ કરતા કહ્યું હતું કે, એકતા વગર શાંતિ નથી.

તેમણે કહ્યું હતું કે જનતાની ઈચ્છાઓને સાંભળવામાં આવી છે અને સમજવામાં આવી છે. શ્વેતોને શ્રેષ્ઠ માનવાની માનસિકતા, ઘરેલુ આતંકવાદને હરાવીશું. હું ઈચ્છું છું કે પ્રત્યેક અમેરિકન આપણી આ લડાઈમાં સામેલ થાય. તેમણે દેશની જનતાને એક સાથે મળીને કામ કરવાનું કહેતા કહ્યું હતું કે દુશ્મનોનો સામનો કરવા માટે એકજૂટ થવું પડશે- ગુસ્સો, નફરત, કટ્ટરવાદ, કાયદાઓનું ઉલ્લંઘન, હિંસા, બીમારી, બેરોજગારી અને નિરાશાની સામે લડવાનું છે.

150 વર્ષમાં પ્રથમ વખત પૂર્વ પ્રમુખ રહ્યા ગેરહાજર
ડોનાલ્ડ ટ્રમ્પ જો બાઈડનની શપથ વિધીમાં હાજર રહ્યા ન હતા. છેલ્લા 150 વર્ષમાં આ પ્રથમ વખત છે જ્યારે નવા પ્રમુખની શપથ વિધીમાં ભૂતપૂર્વ પ્રમુખ ગેરહાજર રહ્યા હોય. ટ્રમ્પ અને તેમના પત્ની મેલેનિયા શપથ વિધીના થોડા કલાકો પહેલા જ પોતાના ફ્લોરિડા ખાતેના ઘરે ગયા હતા. શપથ વિધીમાં બાઈડનની પત્ની જિલ બાઈડન, કમલા હેરિસ અને ડગ એમોફ હાજર રહ્યા હતા. આ ઉપરાંત ભૂતપૂર્વ પ્રમુખ જ્યોર્જ બુશ, બરાક ઓબામા અને બિલ ક્લિન્ટને પણ હાજરી આપી હતી. જ્યારે ભૂતપૂર્વ ફર્સ્ટ લેડી લોરા બુશ, મિશેલ ઓબામા અને હિલેરી ક્લિન્ટન પણ તેમની સાથે આવ્યા હતા.