ઉત્તર કોરિયામાં બાળકો માટે નવો આદેશ, દોઢ કલાક કિમ જોંગ ઉન વિશે ભણવું ફરજિયાત

પ્યોંગયાંગ: દુનિયામાં બાળકો આગળ જતા સારા વ્યક્તિ બનવાનું સપનું જોતા હોય છે ત્યાં ઉત્તર કોરિયામાં બાળકોને અમેરિકા પર હુમલો કરવા માટેનું શીખવાડવામાં આવી રહ્યું છે. ઉત્તરકોરિયાની પ્રી-સ્કૂલમાં નવા આદેશો મુજબ બાળકોને દરરોજ કિમ જોંગ ઉન વિશે પણ ભણવાનું રહેશે. ત્યાંની સ્કૂલોના અભ્યાસક્રમમાં કિમ જોંગ ઉન અને તેમના બે પૂર્વ તાનાશાહના ઉછેર વિશે જણાવવામાં આવ્યું છે.

ઉત્તર કોરિયાની પ્રી સ્કૂલમાં ત્રણ કલાક અભ્યાસ થશે કે જેમાં અડધો સમય એટલે કે દોઢ કલાક સુધી માત્ર કિમ જોંગ ઉન વિશે બાળકોને ભણાવવામાં આવશે. અગાઉ બાળકો દરરોજ માત્ર અડધો કલાક કિમ જોંગ ઉન વિશેનો અભ્યાસ કરતા હતા. એવું જાણવા મળી રહ્યું છે કે કિમ જોંગ ઉનની બહેન કિમ યો જોંગે ગત મહિને જાહેર કરેલા નવા નિયમો મુજબ હવે પ્રી સ્કૂલના બાળકોને દરરોજ દોઢ કલાક કિમ જોંગ ઉન વિશેનો અભ્યાસ કરવાનો રહેશે.

ઉત્તર કોરિયાના એક સૂત્ર તરફથી મળતી માહિતી મુજબ હવે ત્યાંની સ્કૂલના શિક્ષકો સહિત પેરેન્ટ્સને એ વાતની ચિંતા સતાવી રહી છે કે નવા નિયમોથી બાળકોના આગામી સ્તરના અભ્યાસમાં અડચણ આવશે. હવે ઘણાં માતા-પિતા એવું વિચારી રહ્યા છે કે બાળકો ઘરમાં અભ્યાસ કરે તે યોગ્ય છે. ઉત્તર કોરિયાની શાળામાં અમેરિકાના સૈનિકો વિરુદ્ધ હિંસા શીખવાડવામાં આવે છે.

નોર્થ કોરિયાની વિડીયો ગેમમાં અમેરિકાના સૈનિકો પર હુમલાને પ્રોત્સાહન આપવામાં આવે છે. આ વિડીયો ગેમ્સમાં અમેરિકા પર મિસાઈલ હુમલાનો વિકલ્પ આપવામાં આવે છે. આ રીતે ઉત્તર કોરિયાના બાળકોના મગજમાં ઝેર ભરવામાં આવે છે. રસપ્રદ વાત એ છે કે આ નવા નિયમો તૈયાર કરનાર કિમ જોંગ ઉનની બહેન કિમ યો જોંગે ઉત્તર કોરિયા નહીં પણ સ્વિત્ઝરલેન્ડની શાળામાંથી અભ્યાસ કર્યો છે. એવું પણ કહેવાય છે કે કિમ યો જોંગ તેના ભાઈની ખુરશીની દાવેદાર છે.