શરમજનક! USના કેલિફોર્નિયામાં ઉપદ્રવીઓએ મહાત્મા ગાંધીની પ્રતિમા તોડી પાડી

કેલિફોર્નિયા: અમેરિકાના કેલિફોર્નિયામાં એક પાર્કમાં મહાત્મા ગાંધીની પ્રતિમાને અજાણ્યા ઉપદ્રવીઓએ તોડી દીધી. આ ઘટના સામે આવતા દેશભરમાં ભારતીય-અમેરિકન સમુદાય ભારે રોષ જોવા મળી રહ્યો છે. આને 'હેટ ક્રાઈમ' ગણાવીને અધિકારીઓથી ગુનેગારોને વહેલી તકે ઝડપીને તેમને સજા કરવાની માંગ કરવામાં આવી છે.

6 ફૂટ ઉંચાઈ અને આશરે 300 કિલો વજનની આ બ્રોન્ઝની પ્રતિમા ડેવિસ સેન્ટ્રલ પાર્કમાં હતી. તેને જોતા, એવું લાગે છે કે તે ઘૂંટણના નીચે પગના ભાગથી કાપવામાં આવી છે. ચહેરો ક્ષતિગ્રસ્ત છે. 27 જાન્યુઆરીની સવારે એક પાર્કના એક કર્મચારીએ પ્રતિમાને જોઈ હતી. ડેવિસના કાઉન્સિલમેન લ્યુકસ ફ્રેરિશના જણાવ્યા અનુસાર તપાસ સુધી પ્રતિમાને હટાવવામાં આવી રહી છે. તપાસકર્તાઓને હજી સુધી ખબર નથી કે શા માટે આ પ્રતિમાને પાડી દેવામાં આવી છે.

સમજી શકાય છે ગંભીરતા
ડેવિસ પોલીસ વિભાગના ડેપ્યુટી ચીફ પોલ ડોરોશોવે સ્વીકાર્યું કે શહેરના એક સમુદાય માટે પ્રતિમાનું સાંસ્કૃતિક મહત્વ છે. આવી સ્થિતિમાં, તેની ગંભીરતા સમજી શકાય છે. આ પ્રતિમાને ભારત સરકારે ડેવિસને દાનમાં આપી હતી, જો કે, ભારતમાં લઘુમતીઓના સંગઠન (OFMI)એ તેનો વિરોધ કર્યો છે અને તેને હટાવવાની માંગ કરી છે.

હેટ ક્રાઈમના તપાસની માંગ
બીજી તરફ ફ્રેન્ડ્સ ઓફ ઇન્ડિયા સોસાયટી ઇન્ટરનેશનલના ગૌરાંગ દેસાઇએ કહ્યું છે કે ભારત વિરોધી અને હિન્દુ વિરોધી કટ્ટરવાદી સંગઠનો અને ખાલિસ્તાની અલગાવવાદીઓએ નફરતનું વાતાવરણ ઉભું કર્યું છે. આ ઘટનાની તપાસ 'હેટ ક્રાઇમ' હેઠળ થવાની માંગ કરવામાં આવી રહી છે. તેને ફક્ત મહાત્મા ગાંધી જ નહીં પરંતુ ભારતીયો અને ભારતીય અમેરિકનો સામેનો ગુનો ગણાવ્યો છે.

બીજી તરફ કેલિફોર્નિયામાં એક ખાલિસ્તાની સમર્થક સંસ્થાએ આ ઘટના અંગે ખુશી પણ વ્યક્ત કરી હતી. અમેરિકામાં ગાંધી પ્રતિમા સાથે દુર્વ્યવહાર થવાની આ પહેલી ઘટના નથી. ડિસેમ્બર 2020માં ખાલિસ્તાનના સમર્થકોએ વોશિંગ્ટન ડીસીમાં ભારતીય દૂતાવાસની સામેની પ્રતિમાને નુકસાન પહોંચાડ્યું હતું.