મલેશિયામાં મળ્યો કોરોના વાયરસનો નવો પ્રકાર, સામાન્યથી 10 ગણો વધુ સંક્રામક

ક્વાલાલંપુર: મલેશિયામાં રિસર્ચરોને કોરોના વાયરસનો એક એવો સ્ટ્રેન મળ્યો છે જે 10 ગણો વધુ ચેપી છે. કોરોનાના આ મ્યૂટેશનને વિશ્વભરમાં D614Gના નામે ઓળખવામાં આવે છે. આ મ્યૂટેશન અગાઉ વિશ્વના અન્ય દેશોમાં જોવા મળ્યું હતું પરંતુ મલેશિયામાં 45માંથી ઓછામાં ઓછા ત્રણ કેસમાં હાલમાં જ જોવા મળ્યું છે. ભારતથી મલેશિયા પરત ફરેલા એક રેસ્ટોરાંના માલિક 14 દિવસના હોમ ક્વોરન્ટીનનો ભંગ કરીને નીકળ્યા તે પછી શરૂ થયું. આ વ્યક્તિને પાંચ મહિનાની જેલ અને દંડ ફટકારવામાં આવ્યો છે.

આ જ વાયરસ સ્ટ્રેન ફિલિપિન્સથી પરત આવેલા લોકોમાં પણ જોવા મળ્યો છે. અમેરિકાના ટોચના સ્વાસ્થ્ય સલાહકાર ડૉ. ફોસીએ કહ્યું કે, આ મ્યૂટેશનથી કોરોના વાયરસું સંક્રમણ વધુ ઝડપથી ફેલાઈ શકે છે. મલેશિયાના સ્વાસ્થય વિભાગના ડાયરેક્ટર જનરલ નૂર હિશામ અબ્દુલ્લાએ કહ્યું કે, કોરોના વાયરસના નવા મ્યૂટેશનના ગંભીર પરિણામ જોવા મળી શકે છે. અત્યાર સુધી કોરોના વેક્સીન બનાવવા માટે થયેલું રિસર્ચ આ મ્યૂટેશન સામે બિનઅસરકારક સાબિત થઈ શકે છે.

કોરોના વાયરસમાં થઈ રહેલું મ્યૂટેશન અમેરિકા અને યુરોપના દેશોમાં ઝડપથી ફેલાઈ રહ્યું છે. તો વર્લ્ડ હેલ્થ ઓર્ગેનાઈઝેશને કહ્યું છે કે, હજી સુધી સાબિત નથી થઈ શક્યું કે કોરોના વાયરસના મ્યૂટેશનથી લોકોને વધુ ગંભીર બીમારીઓ થઈ રહી છે. સેલ પ્રેસમાં પ્રકાશિત એક રિસર્ચ પેપરમાં કહેવાયું છે કે, વર્તમાન સમયમાં વિકસાવાઈ રહેલી વેક્સિનની અસરકારકતા પર મ્યૂટેશનની મોટી અસર થશે નહીં.

મલેશિયાના સ્વાસ્થ્ય વિભાગના ડાયરેક્ટર જનરલે કહ્યું કે, લોકોને સાવધ રહેવાની અને સાવચેતી રાખવાની જરૂર છે. કોરોનાનો આ નવો પ્રકાર મલેશિયામાં મળ્યો છે. લોકોના સહકારની ખૂબ જરૂર છે, જેથી આ મ્યૂટેશનની સંક્રમણ કડીને તોડી શકાય.