બુગાટી, પોર્શ, મર્સિડીઝ...સુપરકાર્સનો વળ્યો કચ્ચરઘાણ, 30 કરોડનો અકસ્માત!

સ્વિત્ઝર્લેન્ડના સ્વિસ આલ્પ્સના શાનદાર 'ગોટહાર્ડ પાસ' પર જ્યારે મર્સિડીઝ બેન્ઝ સી-ક્લાસ વેગન, પોર્શ 911 કેબ્રિયોલેટ, બુગાટી શિરોન અને કેમ્પર (મોટર હાઉસ) એકબીજાને ટકરાયા તો આ દુર્ઘટના 4 મિલિયન ડોલરના નુકસાનમાં ફેરવાઈ હતી. જો ભારતીય ચલણમાં આ અકસ્માતને જોવામાં આવે તો આશરે 30 કરોડ રુપિયાનું નુકસાન થવા પામ્યું છે. કથિત રીતે આ દુર્ઘટના ત્યારે થઈ જ્યારે 3 લક્ઝુરિયસ કાર ધીમી ઝડપથી ચાલનાર કેમ્પરને ઓવરટેક કરવાની કોશિશ કરી રહી હતી. અકસ્માતની તસવીરો ઈન્ટરનેટ પર વાયરલ થઈ રહી છે.


વાયરલ થઈ તસવીરો
આ ઘટનાની તસવીરોને ફેસબુક પર Rainier Johnson Supercars નામના પેજથી શૅર કરવામાં આવી છે. કેપ્શનમાં તેણે લખ્યું છે કે,'બુગાટી અને પોર્શ સ્વિત્ઝર્લેન્ડમાં દુર્ઘટનાગ્રસ્ત થઈ હતી. ત્રણ ગાડીઓ એક કેમ્પર પાછળ ચાલી રહી હતી. કથિત રીતે બુગાટીએ કેમ્પરને ઓવરટેક કરવાની કોશિશ કરી હતી. આવું જ પોર્શએ કર્યું અને બન્ને વચ્ચે અથડામણ થઈ હતી. મર્સિડીઝ અને કેમ્પરને પણ નુકસાન પહોંચ્યું છે. જોકે, એ સ્પષ્ટ નથી કે કઈ રીતે અકસ્માત થયો.'


કોઈને ગંભીર ઈજાઓ નહીં
કેનટોન ઉરી પોલીસ અનુસાર, આ દુર્ઘટનામાં આશરે 4 મિલિયન ડોલર (આશરે 30 કરોડ રુપિયા)નું નુકસાન થયું છે. તસવીરોમાં સ્પષ્ટ જોવા મળે છે કે, આ દુર્ઘટના જોરદાર હતી. જોકે, દુર્ઘટનામાં સૌથી વધારે નુકસાન પોર્શ કારને થયું છે. જેના આગળના ભાગના તો ફૂરચા બોલી ગયાં છે. નસીબથી અકસ્માતમાં કોઈ જ જાનહાની કે ગંભીર ઈજા પહોંચી નથી. જોકે, મર્સિડીઝના ડ્રાઈવરને થોડી ઈજાઓ પહોંચી છે, જેના કારણે તેને હોસ્પિટલ લઈ જવામાં આવ્યો છે.