બ્રિટનમાં કોરોનાનો નવો પ્રકાર, યુરોપિયન દેશોએ ફ્લાઈટ્સ પર પ્રતિબંધ મૂક્યો

બર્લિન/લંડન: દક્ષિણ ઈંગ્લેન્ડમાં કોરોના વાયરસનો નવો પ્રકાર સામે આવતા નેધરલેન્ડ અને બેલ્જિયમે બ્રિટનથી આવતી ફ્લાઈટ્સ પર પ્રતિબંધ મૂક્યો છે. જ્યારે જર્મની ફ્લાઇટ્સની સંખ્યા મર્યાદિત કરવાનું વિચારી રહ્યું છે, જેથી યુરોપિયન ખંડમાં આ પ્રકારનો ચેપ ન ફેલાય. એવું કહેવામાં આવી રહ્યું છે કે વાયરસ ઝડપથી ફેલાઇ રહ્યો છે પરંતુ તે વધારે ઘાતક છે તેના કોઈ પુરાવા મળ્યા નથી.

બીજી તરફ નેધરલેન્ડ્સે આ વર્ષના અંત સુધી બ્રિટનથી આવતી ફ્લાઇટ્સ અટકાવી દીધી છે અને બેલ્જિયમે મધ્યરાત્રિથી બ્રિટનથી આવતી-જતી ફ્લાઇટ્સ પર 24 કલાક માટે પ્રતિબંધ મૂક્યો છે. બેલ્જિયમે બ્રિટનને જોડતી રેલ સેવા પણ સ્થગિત કરી દીધી છે. જર્મન અધિકારીઓ કહે છે કે તેઓ બ્રિટનથી આવતા વિમાનો વિશે 'ગંભીર વિકલ્પો' પર વિચારણા કરી રહ્યા છે, પરંતુ હજી સુધી નિર્ણય લીધો નથી.

બ્રિટનના પગલાને લીધે નિર્ણય લેવાયો
નેધરલેન્ડ્સે કહ્યું કે, તે બ્રિટનમાં વાયરસના આ નવા પ્રકારને રોકવા માટે અન્ય યુરોપિયન દેશો સાથે વિવિધ સંભાવનાઓની ચર્ચા કરશે. યુરોપિયન યુનિયનના ત્રણ સભ્ય દેશોની સરકારોએ જણાવ્યું હતું કે, તેઓ શનિવારે લંડન અને આજુબાજુના વિસ્તારો માટે બ્રિટિશ વડાપ્રધાન બોરીસ જ્હોન્સન દ્વારા લેવામાં આવેલા કડક પગલાને ધ્યાનમાં રાખીને આ નિર્ણય લઈ રહ્યા છે.

ઝડપથી ફેલાઈ રહ્યો છે કોરોનાનો નવો પ્રકાર
જ્હોન્સને અગાઉ તાત્કાલિક અસરથી કેટેગરી -4ના કડક પ્રતિબંધો લાગુ કરતા કહ્યું હતું કે, કોરોના વાયરસનો નવો પ્રકાર દેખાયો છે, જે અગાઉના વાયરસ કરતા 70 ટકા વધુ ઝડપથી ફેલાય છે, અને લંડનમાં અને દક્ષિણ ઇંગ્લેંડમાં ઝડપથી ફેલાઈ શકે છે. ચેપનો દર વધતા જોઈ રવિવારથી કડક પ્રતિબંધો સાથે લોકડાઉન લાગુ કરવામાં આવ્યું હતું, લાખો લોકોને ઘરની અંદર જ રહેવાની ફરજ પડી હતી. બિનજરૂરી ચીજોની દુકાનો અને મથકો પણ બંધ કરી દેવામાં આવ્યા છે.

બેલ્જિયન વડાપ્રધાન એલેક્ઝાંડર ડી ક્રુએ રવિવારે કહ્યું હતું કે, તેઓ સાવચેતીના ભાગરૂપે 24 કલાકના ફ્લાઇટ પ્રતિબંધના આદેશ જારી કરી રહ્યા છે, જે મધ્યરાત્રિથી અમલી બનશે. તેમણે કહ્યું, આ નવા પ્રકારના વાયરસ વિશે ઘણા પ્રશ્નો છે. જો કે, તેમણે આશા વ્યક્ત કરી હતી કે મંગળવારે પરિસ્થિતિ વધુ સ્પષ્ટ થશે.

નવો વાયરસ વધુ ઘાતક હોવાના કોઈ પુરાવા નથી
આ દરમિયાન, ઇંગ્લેન્ડના ચીફ મેડિકલ ઓફિસર પ્રોફેસર ક્રિસ વિટ્ટીએ કહ્યું કે, અમે વર્લ્ડ હેલ્થ ઓર્ગેનાઇઝેશનને એલર્ટ કરી દીધું છે અને નવા પ્રકારના વાયરસ વિશે વધુ સમજવા માટે ઉપલબ્ધ માહિતીનો અભ્યાસ કરી રહ્યા છીએ. તેમણે કહ્યું, નવા પ્રકારનો વાયરસ વધુ જીવલેણ છે તે સાબિત કરવા માટે હાલમાં કોઈ પુરાવા નથી.