કોરોના સામે ખરી લડાઈ જીત્યો છે આ દેશ, 100 દિવસમાં નથી નોંધાયો એક પણ કેસ

સમગ્ર વિશ્વમાં ન્યૂઝીલેન્ડ એક ઉદાહરણ રૂપ બની ગયો છે. છેલ્લા 100 દિવસથી ઘરેલુ સ્તરે એક પણ નવો કેસ નોંધાયો નથી. ન્યૂઝીલેન્ડે માર્ચના અંતમાં ચુસ્ત પણે લોકડાઉન લાગુ કરીને કોરોનાને સંપૂર્ણ રીતે નિયંત્રણમાં લઈ લીધો હતો. ત્યારે દેશમાં ફક્ત 100 લોકો જ ચેપગ્રસ્ત હતા.

રવિવારે પૂરા થયેલા 100 દિવસમાં ન્યૂઝીલેન્ડમાં ઘરેલુ સ્તરે કોરોનાનો એક પણ કેસ નોંધાયો નથી. છેલ્લા ત્રણ મહિનાથી દેશમાં જે ગણ્યાગાંઠ્યા કેસ આવ્યા છે તે વિદેશથી પરત ફર્યા હતા અને તેમને એરપોર્ટથી જ ક્વોરેન્ટીન કરી દેવામાં આવ્યા છે. યુનિવર્સિટી ઓફ ઓટાગોમાં રોગચાળાના નિષ્ણાત પ્રોફેસર માઈકલ બેકરે કહ્યું છે કે આ શ્રેષ્ઠ વિજ્ઞાન અને શ્રેષ્ઠ રાજકિય નેતૃત્વની કમાલ છે. તમે વિશ્વમાં જોશો તો જે દેશોમાં ચેપ પર નિયંત્રણ મેળવવામાં સફળતા મળી છે તેમાં આ બે વસ્તુઓનો સંગમ છે.

કોરોના સામેની લડાઈમાં ન્યૂઝીલેન્ડના વડાપ્રધાન જેસિન્ડા એર્ડને જે રીતે નેતૃત્વ કર્યું છે તેની વિશ્વભરમાં પ્રશંસા થઈ રહી છે. તેમણે લોકડાઉનમાં લોકોને રોજ સ્થિતિની જાણકારી આપી અને કડકાઈપૂર્વક લોકડાઉનનું પાલન કરાવીને કોરોના સામે જંગ જીતવાનું આશ્વાસન આપ્યું હતું. દેશમાં અત્યાર સુધી કોરોનાના 1500 કેસ આવ્યા છે અને 22 લોકોના મૃત્યુ થયા છે.