ટેક્સાસ હિંસા બાદ ઓબામા બોલ્યા, 'ડરી ગયો છું'

વોશિંગ્ટનઃ અમેરિકાના પ્રમુખ બરાક ઓબામાએ ટેક્સાસના ડલાસ શહેરમાં થયેલી હિંસાની નિંદા કરી છે. ઓબામાએ આ પ્રદર્શનકારીઓ દ્વારા પોલીસને નિશાન બનાવવાને અયોગ્ય અને સંપૂર્ણ રીતે પૂર્વયોજિત કૃત્ય ગણાવ્યું છે. તેમણે આ ઘટનાને ખોફનાફ ગણાવતા કહ્યું હતું કે, તેઓ આખા ઘટનાક્રમથી ઘણા ડરી ગયા છે.

ડલાસ શહેરમાં શુક્રવારે સવારે અશ્વેત લોકોના વિરોધ પ્રદર્શન દરમિયાન કેટલાક બંદૂકધારી હુમલાખોરોએ પોલીસ પર ગોળીબાર કર્યો હતો. ત્યાર બાદ એક હુમલાખોરની પોલીસ સાથે અથડામણ થઈ ગઈ હતી. આ ઘટનામાં પાંચ પોલીસ અધિકારીઓનાં મોત નીપજ્યાં હતાં, જ્યારે છ પોલીસ કર્મચારી ઘાયલ થયા હતા. પોલીસ સાથેની અથડામણમાં એક હુમલાખોરે પોતાને ગોળી મારી દીધી હતી. શહેરમાં કાયદો-વ્યવસ્થાની સ્થિતિ નિયંત્રણમાં રાખવા માટે મોટી સંખ્યામાં પોલીસ તહેનાત કરી દેવાઈ છે. હુમલાખોરોને પકડવા માટે પોલીસ ઘણી જગ્યાઓ પર તપાસ કરી રહી છે.

ગુરુવારે હિંસા બાદ પ્રમુખ ઓબામાએ તેમના સંદેશમાં કહ્યું હતું કે, આ તપાસનું ભલે જે પરિણામ આવે, પંરતુ એટલું તો નક્કી છે કે, આ પ્રકારની ઘટનાઓ અલગ અલગ નથી. તેમણે ન્યાય વ્યવસ્થાની ખામીઓનો ઉલ્લેખ કરતા કહ્યું હતું કે, સમય સમયે નસ્લીય ભેદભાવની ઘટનાઓ સામે આવતી રહે છે. આ ઘટનાઓની અસર એ થાય છે કે, પોલીસ અને સરકાર તથા કેટલાક સમુદાયો વચ્ચે વિશ્વાસ ઘટી રહ્યો છે. ઘટનાની ટીકા કરતા ઓબામાએ એમ પણ કહ્યું હતું કે, પોતાનો જીવ જોખમમાં મૂકીને ફરજ બજાવનારા પોલીસ અધિકારીઓ માટે સૌને સન્માન છે. તેમણે અપીલ પણ કરી હતી કે, એક દેશ તરીકે અમેરિકામાં દરેકે ન્યાયમાં નસ્લીય ભેદભાવની ઘટનાઓ ન બને તે માટે પ્રયાસ કરવા જોઈએ.