મુંબઈ હુમલાના માસ્ટરમાઈન્ડ હાફિઝ સઈદને પાકની કોર્ટે ફટકારી 10 વર્ષની સજા

ઈસ્લામાબાદ: મુંબઈમાં 26/11એ થયેલા હુમલાના માસ્ટરમાઈન્ડ અને જમાત-ઉદ-દાવાના ચીફ હાફિઝ સઈદને 10 વર્ષની જેલની સજા ફટકારવામાં આવી છે. ટેરર ફંડિંગના બે મામલામાં પંજાબની એક કોર્ટે સજા સંભળાવી છે. મુંબઈમાં થયેલા આતંકવાદી ઘટનામાં 166 લોકોના મોત થયા હતા અને આ હુમલાએ દેશ સહિત સમગ્ર દુનિયાને હચમચાવી નાખ્યા હતા.

એન્ટી ટેરર કોર્ટે જમાત-ઉદ-દાવાના ચીફ હાફિઝ સઈદને 10 વર્ષની સજા ફટકારવાની સાથે તેની સંપત્તિ જપ્ત કરવાનો આદેશ આપ્યો છે અને 1..1 લાખ રૂપિયાનો દંડ પણ ફટકાર્યો છે. સઈદના બે સાથીઓ જફર ઈકબાલ અને યાહયા મુજાહિદને 10.5 વર્ષની જેલ, જ્યારે અબ્દુલ રહમાન મક્કીને 6 મહિનાની જેલની સજા ફટકારવામાં આવી છે.

કાઉન્ટર ટેરરિઝમ ડિપાર્ટમેન્ટએ જમાત-ઉદ-દાવાની સામે 41 કેસ નોંધ્યા છે, જેમાંથી 24માં ચુકાદો આવી ગયો છે, જ્યારે બાકીના કેસ કોર્ટમાં પડતર છે. સઈદની સામે ચાર કેસોમાં ચુકાદો આવી ચૂક્યો છે.

ફેબ્રુઆરીમાં થઈ હતી 11 વર્ષની કેદસંયુક્ત રાષ્ટ્રએ હાફિઝ સઈદને વૈશ્વિક આતંકવાદી જાહેર કરેલો છે અને અમેરિકાએ તેના પર એક કરોડ યુએસ ડોલરનું ઈનામ રાખ્યું છે. તેની ગત વર્ષે 17 જુલાઈએ આતંકવાદને ફંડિંગના મામલામાં ધરપકડ કરાઈ હતી. આતંકવાદને ફંડિંગના બે કેસમાં તેને આ વર્ષે ફેબ્રુઆરીમાં 11 વર્ષની કેદની સજા ફટકારવામાં આવી હતી. તે લાહોરની કડક સુરક્ષાવાળી કોટ લખપત જેલમાં બંધ છે.