દેવું કરીને દેવું ચૂકતે કરશે પાકિસ્તાન, હવે ચીન કરશે મદદ

સાઉદી અરબે પાકિસ્તાનને આ વર્ષના અંત સુધી બાકી રહેલા બે બિલિયન ડોલરની લોન ચૂકતે કરવાનું કહ્યું હતું. પાકિસ્તાનની કંગાળ આર્થિક પરિસ્થિતિને જોતા વડાપ્રધાન ઈમરાન ખાને પોતાના મિત્ર ચીન પાસે ઉધારી માંગી છે. ત્યારબાદ ચીને 1.5 બિલિયન ડોલરની લોન આપવાનું નક્કી કર્યું છે. બાકી રહેલા ડોલરની વ્યવસ્થા પાકિસ્તાન પોતે કરશે.

કાશ્મીર મામલાને લઈને પાકિસ્તાનના વર્તનથી સાઉદી અરબે જૂલાઈમાં પોતાના આર્થિક પેકેજને પરત લીધું હતું. આ પેકેજમાં સાઉદી અરબે ઓક્ટોબર 2018મા આપ્યું હતું. આ અંતર્ગત સાઉદી અરબે પાકિસ્તાનને 3 વર્ષ માટે 6.2 બિલિયન ડોલરની લોન આપી હતી જેમાંથી 3 બિલિયન ડોલરની રોકડ સહાય સામેલ હતી જ્યારે બાકીના રૂપિયાની અવેજમાં પાકિસ્તાનને તેલ અને ગેસનો પૂરવઠો આપવાનો હતો. જોકે, પાકિસ્તાની વિદેશ મંત્રીના ભડકાઉ નિવેદનોથી સાઉદી અરબ રોષે ભરાયું હતું અને 2021મા સમાપ્ત થનારા આ પેકેજને 2020મા જ બંધ કરી દીધું હતું.

આ કરાર અનુસાર શરૂઆતમાં સાઉદીએ પાકિસ્તાનને રોકડ અને તેલની સુવિધા ફક્ત એક વર્ષ માટે આપી હતી, પરંતુ ત્યારબાદના વર્ષોમાં તેને વધારીને ત્રણ વર્ષ કરવામાં આવ્યા હતા. આ ત્રણ બિલિયન ડોલરની રોકડ સહાયતા માટે પાકિસ્તાનને 3.3 ટકા વ્યાજ પણ ચૂકવવું પડશે. તેવામાં ઈમરાન ખાન સામે ચીન પાસેથી લોન લીધા સિવાય કોઈ વિકલ્પ રહ્યો નથી.