FATFના ગ્રે લિસ્ટમાં જ રહેશે પાકિસ્તાન, ઈમરાન ખાનને જોવા પડશે હજુ વધુ ખરાબ દિવસો

ઈસ્લામાબાદ: ફાઈનાન્શિયલ એક્શન ટાસ્ક ફોર્સની પેરિસમાં મળેલી ઓનલાઈન બેઠકમાં પાકિસ્તાનને ગ્રે લિસ્ટમા જ રાખવા પર મહોર લગાવી દેવાઈ છે. શુક્રવારે સાંજે બહાર પડાયેલા નિવેદનમાં જણાવાયું છે કે, પાકિસ્તાનની સરકાર આતંકવાદ વિરુદ્ધ 27 સૂત્રીય એજન્ડાને પૂરો કરવામાં નિષ્ફળ રહી છે. FATFએ પણ કહ્યું છે કે, પાકિસ્તાને સંયુક્ત રાષ્ટ્રના પ્રતિબંધિત આતંકવાદીઓ સામે પણ કોઈ નક્કર કાર્યવાહી નથી કરી.

અમેરિકા-ફ્રાંસ સહિત આ દેશ પણ પાકિસ્તાન વિરુદ્ધ
આ ઉપરાંત નામિત કરનારા ચાર દેશ- અમેરિકા, બ્રિટન, ફ્રાંસ અને જર્મની પણ પાકિસ્તાનની ધરતી પરથી ગતિવિધિ ચલાવી રહેલા આતંકવાદી સંગઠનો સામે કાર્યવાહી કરવાની તેની પ્રતિબદ્ધતાથી સંતુષ્ટ નથી. એફએટીએફએ પાકિસ્તાનને આતંકવાદને આર્થિક મદદ સંપૂર્ણ રીતે રોકવા માટે કુલ 27 એજન્ડા પૂરા કરવાની જવાબદારી આપી હતી, જેમાંથી તેણે હજુ 21ને પૂરા કર્યા છે અને કેટલાક કામ પૂરા નથી થઈ શક્યા.

ગ્રે લિસ્ટમાં રહેશે પાકિસ્તાન તો શું થશે અસર
પાકિસ્તાન એફએટીએફના ગ્રે લિસ્ટમાં રહેશે તો તેની આર્થિક સ્થિતિમાં મોટો ફટકો પડવાનું નિશ્ચિત છે. પાકિસ્તાનને આંતરાષ્ટ્રીય મોનેટરી ફંડ, વર્લ્ડ બેંક અને યુરોપીય સંઘ તરફથી આર્થિક મદદ મળવાનું પણ મુશ્કેલ થઈ જશે. પહેલેથી જ કંગાળ થવાના આરે ઊભેલા પાકિસ્તાનની સ્થિતિ વધુ ખરાબ થઈ જશે.બીજા દેશોમાંથી પણ પાકિસ્તાનને આર્થિક મદદ મળવાનું બંધ થઈ જશે. કેમકે, કોઈપણ દેશ આર્થિક રીતે અસ્થિર દેશમાં રોકાણ કરવા નથી ઈચ્છતો.

પાકિસ્તાન પર જીડીપીના 90 ટકા દેવું!
પાકિસ્તાનના મીડિયા રિપોર્ટ મુજબ, પાકિસ્તાનનું જાહેર દેવું આ વર્ષે જૂન સુધી વધીને 37,500 અબજ પાકિસ્તાની રૂપિયા કે જીડીપીના 90 ટકા થઈ જશે. રિપોર્ટમાં કહેવાયું છે કે, પાકિસ્તાનન માત્ર આ વર્ષે જ દેવું ચૂકવવા પર 2,800 અબજ રૂપિયા ખર્ચ કરશે. જે રેવન્યુ ડિપાર્ટમેન્ટના અંદાજિત કર સંગ્રહના 72 ટકા છે. બે વર્ષ પહેલા જ્યારે પાકિસ્તાન તહરીકે-એ-ઈન્સાફ (પીટીઆઈ) સરકાર સત્તામાં આવી હતી, ત્યારે જાહેર દેવું 24,800 લાખ કરોડ રૂપિયા હતું, જે ઝડપથી વધી રહ્યું છે.

2018માં ગ્રે લિસ્ટમાં મૂકાયું હતું
પાકિસ્તાનને જૂન 2018માં ગ્રે લિસ્ટમાં મૂકાયું હતું. ઓક્ટોબર 2018 અને ફેબ્રુઆરી 2019માં થયેલા રિવ્યુમાં પણ પાકિસ્તાનને રાહત નહોંતી મળી. પાક એફએટીએફની ભલામણો પર કામ કરવામાં નિષ્ફળ રહ્યું છે. આ દરમિયાન પાકિસ્તાનમાં આતંકવાદી સંગઠનોને વિદેશમાંથી અને સ્થાનિક સ્તર પર આર્થિક મદદ મળી છે.

ઈરાન અને ઉત્તર કોરિયા પહેલેથી છે બ્લેકલિસ્ટેડએફએટીએફ દ્વારા ઈરાન અને ઉત્તર કોરિયાને બ્લેકલિસ્ટમાં રખાયા છે. એટલે કે, તેઓ આંતરાષ્ટ્રીય નાણાકીય સંસ્થાઓ જેવી કે આઈએમએફ અને વર્લ્ડ બેંક તરફથી કોઈ લોન નહીં મેળવી શકે. તેનાથી તેમને નાણાકીય ડીલ કરવામાં સમસ્યાઓનો સામનો કરવો પડી રહ્યો છે.