ફેબ્રુઆરી 2020 સુધી FATFના ગ્રે લિસ્ટમાં પાક, ત્રણ દેશોએ પ્રતિબંધથી બચાવી લીધું

પેરિસઃ ફાઈનાન્સિયલ એક્શન ટાસ્ક ફોર્સે (એફએટીએફ) આગામી વર્ષે ફેબ્રુઆરી સુધી પાકિસ્તાનને ગ્રે લિસ્ટમાં રાખવાનો નિર્ણય લીધો છે. એફએટીએફએ ઈસ્લામાબાદને ટેરર ફંડિંગ અને મની લોન્ડ્રિંગ જેવા મુદ્દાઓ સામે કડક કાર્યવાહી કરવાનો આદેશ આપ્યો છે. પાકિસ્તાની ન્યૂઝ વેબસાઈટ ડોન ન્યૂઝના જણાવ્યા પ્રમાણે પેરિસમાં મંગળવારે એફએટીએફની એક બેઠકમાં પાકિસ્તાનની તે કાર્યવાહીની સમીક્ષા કરવામાં આવી હતી જેને પાકિસ્તાને પહેલા જ મની લોન્ડ્રિંગ અને ટેરર ફંડિંગને નિયંત્રિત કરવા માટે કરી હતી. જોકે, બેઠકમાં કહેવામાં આવ્યું છે કે ઈસ્લામાબાદને આ ચાર મહિનામાં વધુ કડક કાર્યવાહી કરવી પડશે. મની લોન્ડ્રિંગ અને ટેરર ફંડિંગ રોકવા માટે પાકિસ્તાન દ્વારા યોગ્ય પગલાં નહીં ભરવાથી અસંતુષ્ટ એફએટીએફે પાકિસ્તાનને બ્લેક લિસ્ટમાં નાંખવાનો વિચાર કર્યો હતો અને ફેબ્રુઆરી 2020માં આ મામલે અંતિમ નિર્ણય કરવામાં આવશે. પાકિસ્તાનના નાણા મંત્રાલયના પ્રવક્તા ઉમર હમીદ ખાને કહ્યું હતું 18 ઓક્ટોબર પહેલા કંઈ થશે નહીં. આર્થિક મામલાના મંત્રી હમ્માદ અઝહરની આગેવાનીમાં એક પાકિસ્તાની પ્રતિનિધિ મંડળે બેઠકમાં કહ્યું હતું કે ઈસ્લામાબાદે 27માંથી 20 મુદ્દાઓ પર હકારાત્મક પ્રગતિ કરી છે. એફએટીએફે પાકિસ્તાન દ્વારા ઉઠાવવામાં આવેલા પગલાઓ અને વિવિધ ક્ષેત્રોમાં તેની પ્રગતિ પર સંતોષ વ્યક્ત કર્યો છે. ચીન, તુર્કી અને મલેશિયાએ પાકિસ્તાન દ્વારા ઉઠાવવામાં આવેલા પગલાઓની પ્રશંસા કરી છે જ્યારે ભારતે આ દલીલ પર ઈસ્લામાબાદને બ્લેક લિસ્ટમાં મૂકવાની ભલામણ કરી હતી. તુર્કી, ચીન અને મલેશિયા દ્વારા એક સાથે કરવામાં આવેલા સમર્થનના આધારે એફએટીએફે પાકિસ્તાનને બ્લેક લિસ્ટમાં સામેલ નહીં કરવા અને વધુ કડક કાર્યવાહી કરવા માટે વધુ સમય આપવાનો નિર્ણય લીધો છે. 36 દેશોના એફએટીએફ ચાર્ટર અનુસાર કોઈ પણ દેશને બ્લેક લિસ્ટમાં સામેલ નહીં કરવા માટે ઓછામાં ઓછા ત્રણ દેશોના સમર્થનની જરૂર હોય છે.