અભિનંદન અંગે પાકિસ્તાનની પોલ ખોલનારા સાંસદે આપ્યું બીજુ મોટુ નિવેદન

તેમણે કહ્યું હતું કે, મેં રાજકિય મતભેદના કારણે આ નિવેદન આપ્યું હતું. તેને પાકિસ્તાની સેના સાથે જોડવું યોગ્ય નથી. હું મારા નિવેદન પર અડગ છું અને તમે તેને ભવિષ્યમાં જોશો. મેં પાકિસ્તાનની રાષ્ટ્રીય સુરક્ષા સમિતિનું નેતૃત્વ કર્યું છે. અમે રાજકિય લોકો છીએ અને ભૂતકાળમાં રાજકિય વિરોધીઓ વિરુદ્ધ નિવેદનો આપતા રહ્યા છીએ. અમે ભવિષ્યમાં પણ આવું કરવાનું જારી રાખીશું, પરંતુ જ્યારે પાકિસ્તાન કે આપણી એકતા કે સંસ્થાઓની વાત આવે છે તો ભારત માટે પાકિસ્તાનનો સંદેશ એકદમ સ્પષ્ટ છે.

અયાઝ સાદિકે થોડા દિવસ પહેલા જ પાકિસ્તાનની નેશનલ એસેમ્બલીમાં કહ્યું હતું કે ભારતના વિંગ કમાન્ડર અભિનંદન વર્ધમાનની મુક્તિ પાકિસ્તાને હુમલાના ડરથી કરી હતી. તેમણે તે પણ કહ્યું હતું કે શાહ મહેમૂદ કુરૈશી તે બેઠકમાં હતા જેમાં ઈમરાન ખાને આવવાની ના પાડી દીધી હતી. કુરૈશીના પગ ધ્રૂજી રહ્યા હતા અને તેમને પરસેવો છૂટી ગયો હતો. કુરૈશીએ કહ્યું હતું કે ખુદાના માટે તેને પાછો સોંપી દો કેમ કે રાત્રે 9 વાગ્યે ભારત પાકિસ્તાન પર હુમલો કરી દેશે.

પાકિસ્તાન મુસ્લિમ લીગના મોટા નેતા અને નેશનલ એસેમ્બલીના ભૂતપૂર્વ સ્પીકર અયાઝ સાદિકના નિવેદન બાદ પાકિસ્તાની સરકાર અને પાકિસ્તાની સેના સતત સ્પષ્ટતા કરી રહી છે. પાકિસ્તાની સેના તરફથી ઈન્ટર-સર્વિસિસ પબ્લિક રિલેશન્સ (આઈએસપીઆર)ના પ્રમુખ મેજર જનરલ બાબર ઈફ્તિખાર ઘણા નિવેદન જારી કરી ચૂક્યા છે. પાકિસ્તાન સરકારના ઘણા મંત્રીઓએ અયાઝ સાદિક વિરુદ્ધ મોરચો ખોલી દીધો છે.

પાકિસ્તાનના વિરોધ પક્ષોના ગઠબંધન પાકિસ્તાન ડેમોક્રેટિક મૂવમેન્ટ (પીડીએમ)ના પ્રમુખ અને જમીયત ઉલેમા-એ-ઈસ્લામના પ્રમુખ મૌલાના ફજલુર રહેમાન પમ અયાઝ સાદિકના સમર્થનમાં આવ્યા છે. તેમણે કહ્યું છે કે અયાઝના નિવેદનને રાજકિય રંગ આપવામાં આવી રહ્યો છે. તેનાથી પાકિસ્તાનને કોઈ લાભ થયો નથી. અમારા રાજકિય વિચારો અલગ-અલગ હોઈ શકે છે પરંતુ જ્યાં પાકિસ્તાનનો સંબંધ છે ત્યાં સમગ્ર દેશ એકજૂટ છે.