ફિલિપાઈન્સના રાષ્ટ્રપ્રમુખે ઓબામાને આપી માની ગાળ

મનીલા: ડ્રગ્સ વિરુદ્ધ ચલાવાયેલા પોતાના અભિયાન અને અન્ય ઘણા કારણોથી વિવાદોમાં ઘેરાયેલા ફિલિપાઈન્સના રાષ્ટ્રપ્રમુખ રોડ્રિગો દુતર્તેએ ફરી એકવખત વિવાદ ઊભો કરી દીધો છે. આ વખતે તેમણે બીજા કોઈને નહીં પરંતુ અમેરિકાના રાષ્ટ્રપ્રમુખ બરાક ઓબામાને નિશાન બનાવ્યા છે અને તેમને માની ગાળ આપી દીધી છે.

રોડ્રિગોએ સોમવારે ઓબામાને ‘…નો પુત્ર’ કહ્યા અને ચેતવણી આપી કે જ્યારે તેઓ તેમને લાઓસમાં મળે ત્યારે તેમને માનવાધિકારના મુદ્દે લેક્ચર ન આપે. હકિકતમાં, દુતર્તેને એ ચિંતા સતાવી રહી છે કે, જ્યારે તે લાઓસમાં ઓબામાને મળશે તો અમેરિકાના રાષ્ટ્રપ્રમુખ ફિલિપાઈન્સમાં ડ્રગ્સ વિરુદ્ધ ચલાવાઈ રહેલા અભિયાનને લઈને તેમને સવાલ કરી શકે છે. ઉલ્લેખનીય છે કે, આ અભિયાનમાં માત્ર બે મહિનામાં જ 2400થી વધુ લોકોનાં મોત થઈ ચૂક્યા છે.

લાઓસ જતા પહેલા દુતર્તેએ એક પ્રેસ કોન્ફરન્સમાં કહ્યું કે, ‘તમારે શિષ્ટ થવું પડશે. માત્ર સવાલ અને નિવેદન ઉછાળતા નહીં.’ તેમણે કહ્યું કે, ‘…ના પુત્ર, હું ફોરમમાં તમને ધિક્કારીશ. જો તમે મારી સાથે એવું કર્યો તો અમે ભૂંડની જેમ કિચડમાં રગદોળાઈશું.’

લાઓસમાં મંગળવારે આસિયાન (એસોસિએશન ઓફ સાઉથ-ઈસ્ટ એશિયન નેશન્સ) તરફથી વૈશ્વિક નેતાઓનું એક સંમેલન આયોજિત કરાઈ રહ્યું છે. આ સંમેલન દરમિયાન ઓબામા અને દુતર્તેની દ્વિપક્ષીય વાતચીત થવાની છે.