બાઈડનને US પ્રમુખ તરીકે સ્વીકારતા નથી પુતિન, જાણો શું છે કારણ?

રશિયન પ્રમુખ વ્લાદિમિર પુતિને કહ્યું છે કે તેઓ અમેરિકાના કોઈ પણ નેતા સાથે કામ કરવા માટે તૈયાર છે પરંતુ તેઓ ચૂંટણીમાં વિજય નોંધાવનારા જો બાઈડનને હજી પણ પ્રમુખ માનવા માટે તૈયાર નથી. વર્તમાન પ્રમુખ ડોનાલ્ડ ટ્રમ્પ અને પુતિન વચ્ચેના સંબંધો સારા રહ્યા છે. બાઈડને ટ્રમ્પને પરાજય આપ્યો છે અને તેઓ અમેરિકાના નવા પ્રમુખ બનવા જઈ રહ્યા છે. જોકે, ટ્રમ્પે હજી સુધી પોતાનો પરાજય સ્વીકાર્યો નથી.

પુતિને રવિવારે રશિયન સ્ટેટ ટીવીને જણાવ્યું હતું કે, અમે અમેરિકાના લોકોનો વિશ્વાસ ધરાવતા કોઈ પણ નેતા સાથે કામ કરવા માટે તૈયાર છીએ. પરંતુ આ વિશ્વાસ ફક્ત એવા ઉમેદવારને આપવામાં આવી શકે છે જેમના વિજયને વિપક્ષ તરફથી માન્યતા આપવામાં આવી હોય અથવા તો પરિણામો કાયદાકિય રીતે નક્કી થયા હોય.

નોંધનીય છે કે ગત ચૂંટણી વખત રશિયા પર ઘણા આક્ષેપો થયા હતા. યુએસ ઈન્ટેલિજન્સે આક્ષેપ મૂક્યો હતો 2016મા થયેલી ચૂંટણીમાં ડોનાલ્ડ ટ્રમ્પને જીતાડવા માટે રશિયાએ દખલ કરી હતી. પુતિને જણાવ્યું છે કે રશિયાએ બાઈડનને અભિનંદન આપ્યા નથી તે ફક્ત એક ઔપચારિકતા હતી તેની પાછળ કોઈ ખરાબ ઈરાદો નથી.

પુતિનને જ્યારે પૂછવામાં આવ્યું હતું કે શું તેમના આ પગલાથી અમેરિકા અને રશિયાના સંબંધો ખરાબ થઈ શકે છે. ત્યારે રશિયન પ્રમુખે જણાવ્યું હતું કે બંને દેશો વચ્ચેના સંબંધોમાં ખરાબ થવા જેવું કશું નથી કેમ કે તે પહેલાથી જ ખરાબ છે.