કેટલી અસરકારક અને સુરક્ષિત છે રશિયાની કોરોના વેક્સીન? અભ્યાસમાં સામે આવી આ વાત

રશિયાએ કોરોના વેક્સીનનું એક નાના ગ્રૂપ પર હ્યુમન ટ્રાયલ કરવામાં આવ્યું હતું. જેમાં એન્ટીબોડી જોવા મળી હતી અને તેની કોઈ આડઅસર પણ જોવા મળી નથી, તેમ આ ધ લેન્સેટ જર્નલમાં શુક્રવારે પ્રકાશિત અહેવાલમાં કહેવામાં આવ્યું છે. 76 લોકો પર આ વેક્સીનની ટ્રાયલ કરવામાં આવી હતી અને તેના પ્રારંભિત તબક્કામાં તે સુરક્ષિત જોવા મળી છે. આ ટ્રાયલમાં ભાગ લેનારાઓમાં 21 દિવસની અંદર જ એન્ટિબોડી વિકસીત થઈ હતી. સંશોધકોએ કહ્યું છે કે આ વેક્સીનની બીજી ખાસિયત એ પણ છે કે 28 દિવસની અંદર તેમાં ટી સેલ રિસ્પોન્સ પણ જોવા મળ્યો છે.

આ વેક્સીનનો બે નાના તબક્કામાં 42 દિવસ સુધી ટ્રાયલ કરવામાં આવી હતી. એક અભ્યાસ વેક્સીનની ફ્રોઝન ફોર્મ્યુલેશન અને બીજો લીઓફિલિસ્ડ ફોર્મ્યુલેશન હતો. ફ્રોઝન ફોર્મ્યુલેશનમાં વેક્સીન માટે વર્તમાન ગ્લોબલ સપ્લાય ચેન્સને ધ્યાનમાં રાખવામાં આવી હતી જ્યારે ફ્રીઝ-ડ્રાઈડ ફોર્મ્યુલેશન જે વિસ્તારોમાં વેક્સીન પહોંચાડવામાં મુશ્કેલીનો સામનો કરવો પડે છે તેને ધ્યાનમાં રાખીને કરવામાં આવી હતી. સંશોધકોનું કહેવું છે કે આ વેક્સીન 2થી 8 ડિગ્રી સેલ્સિયસમાં સ્ટોર કરી શકાય છે.

આ ટ્રાયલ રશિયાની બે હોસ્પિટલમાં કરવામાં આવી હતી અને ઓપન લેબલ તથા નોન-રેન્ડમાઈઝ્ડ હતી એટલે કે ભાગ લેનારાઓને ખબર હતી કે તેઓ વેક્સીન લઈ રહ્યા છે. આ ટ્રાયલમાં 18થી 60 વર્ષની વયજૂથના સ્વસ્થ લોકો સામેલ હતા. તેમણે જ્યારે રેજિસ્ટ્રેશન કરાવ્યું ત્યારે જ તેમને સેલ્ફ-આઈસોલેશનમાં રાખવામાં આવ્યા હતા. આ ઉપરાંત જ્યારે તેમને વેક્સીન આપવામાં આવી ત્યારથી તેઓ 28 દિવસ સુધી હોસ્પિટલમાં રહ્યા હતા.

અભ્યાસમાં જણાવ્યા પ્રમાણે 42 દિવસ સુધી કરવામાં આવેલા અભ્યાસમાં વેક્સીનના બંને ફોર્મ્યુલેશન સુરક્ષિત છે. આમાં જે આડઅસર જોવા મળી તેમાં ઈન્જેક્શન જે જગ્યાએ લેવામાં આવે છે ત્યાં દુઃખાવો રહે છે, હાયપરથર્મિયા, માથાનો દુઃખાવો, વીકનેસ અને મસલ તથા જોઈન્ટ પેઈન રહી હતી. સંશોધકોએ કહ્યું છે કે આવી આડ અસર અન્ય વેક્સીનમાં પણ જોવા મળી છે.